DILI, 12 Juñu 2026 (TATOLI)–Jogadór estranjeiru Vincent Noerty sai eroi ba Santa Cruz FC hafoin marka golu rua hodi lori nia ekipa hadau vitória 2-0 hasoru Emmanuel FC, iha jogu jornada daruak Liga Futebol Timor-Leste (LFTL) Primeira Divizaun 2026 ne’ebé hala’o iha Estádiu Munisipál Dili, sesta kalan.
Ho rezultadu ne’e, Santa Cruz rekolla pontu nen (6) kompletu husi jogu rua (2) no lori nia okupa iha tabela klasifikasaun provizóriu ne’ebé leten liu. Iha sorin seluk, Emmanuel sei iha pontu tolu (3) hafoin sofre nia derrota dahuluk iha époka ne’e.
Jogu hahú ho intensidade aas. Ekipa rua tente domina bola klaran no kria okaziaun ba malu. Maibé Santa Cruz ne’ebé treina husi técniku no estratejiku, hahú hatudu nia forsa iha minutu 30 ba leten.
Santa Cruz halo presaun maka’as ba Emmanuel ho velosidade ne’ebé lais, maibé Emmanuel mantein ho pozisaun defende sira-nia jogu tuir sira-nia tékniku rasik.
Maibé jogu la’o to’o iha minutu 39 bainhira Vincent Noerty (3) simu kruza husi nia kolega liña ninin no ho kalma finaliza ho ain loos hodi loke rezultadu ba 1-0. Golu ne’e halo Estádiu nakdoko ho adeptu Santa Cruz nia lian hakilar.
Maske sofre ona golu ida, Emmanuel nafatin enfrenta jogu, maibé seidauk to’o minutu haat (4), Vincent marka tan nia golu daruak iha minutu 43. Penalidade máximu fó ba Santa Cruz hafoin defeza Emmanuel halo sala hasoru jogadór Santa Cruz nian iha área gurada rede nia oin, xuta bola maka’as ba meiu baliza hodi muda rezultadu ba 2-0.
Golu ne’e mak taka minutu primeira parte tanba to’o jogu termina minutu 45 laiha tan golu ruma akontese no vitória provizória hela ho Santa Cruz.
Tama ba segunda parte, Emmanuel tenta halo reasaun hodi muda jogu. Emmanuel halo presaun ba defeza Santa Cruz, maibé liña trajeira Santa Cruz ne’ebé lidera husi Romário Moniz ho Nilton Carvalho xoke la ba no taka dalan tomak ba armada Emmanuel atu prodús golu.
Ho nune’e, to’o ramata, rezultadu manetin ho 2-0. Vitória ne’e hatudu katak Santa Cruz iha époka ne’e ho ambisaun boot hodi sai kampeaun.
Ekipa Arbitrajen:
Árbitru prinsipál: Bernardinho Mascarinha. Juiz liña, Gabriel Pereira ho Paulo da Costa. Árbitru reserva, Francisco Pereira.
Ho pontu neen (6) ne’e, Santa Cruz tau ona presaun ba ekipa boot sira seluk. Jogu tuir mai sira sei hasoru adversáriu maka’as liután, enkuantu Emmanuel tenke rekupera kedas iha jornada datoluk nune’e la hakat liu dook husi luta ba kampeaun.
Ekipa Santa Cruz
Alexandre Quintão (31), Ricardo Bianco (15), Romario Moniz (4), Nilton Carvalho (16) Vincent Noerty (3), Lansana Beavogui (8), Miguel Silva (24), Amancio de Araujo (18), Fretelino dos Santos (20), Mario Quintão (11), Paulo Gusmão (10).
Jogadór Suplente
Nelson da Costa (23), Zeferino Nheu (12), Juvito Lopes (6), Livio Tilman (30), Arcenio Amaral (7), Zenio Brocklyn (29), Angelito Tilman (19), Nicodemos Pereira (5), Alexandre Moreira (9), Deonisio Rangel (21), Denilson Pereira (13).
Ekipa Emmanuel
Pablo de Jesus (30), Tomas Sarmento (4), Clinton Freitas (14), Mighael (20), Jimmy Mendonça (22), Jonata Pereira (27), Idrissa Camara (6), Israel Wmiau (28), Jhon Lawani (19), Armand Beadound (9), Rivaldo Correia (7).
Jogadór Suplente
Alex Gama (1), Feliciano da Costa (8), Leonildo Xavier (11), Lourenço Pinto (18), Domingos Lopes (21), Fernando Mirin (17), Juninho Ximenes (16), Joanito Barbosa (15), Andenio Ximenes (3), Celestino dos Reis (2), Nuncio da Silva (27).
Jornalista : Horténcio Sanchez
Editór : Cancio Ximenes
