DILI, 03 Juñu 2026 (TATOLI)—Fitun Estudante Lorosa’e (FIEL) FC nia kapasidade joga no maturidade iha jogu kontra Nagardjo FC iha jogu kontinuasaun Liga Futeból Timor-Leste (LFTL) Segunda Divizaun ne’e, hatudu liuhusi avansadu veteranu Expedito Fuel (11) ezekuta penalidade desizivu iha minutu 50 hodi kansela golu sedu Yohan Woppi nian empata 1-1.
Jogu ba ekipa rua ho intensidade aas ne’e realiza iha Estádiu Munisipál Dili, kuarta kalan, ne’e lori FIEL FC mantein lidera Grupu A ho pontu 7, enkuantu Nagardjo kolekta pontu lima (5) husi jogu tolu.
Jogu ne’ebé la’o dramatiku ne’e lidera husi Árbitru Cándido Manuel Belo, juiz liña Henrique Pereira, Januario Salsinha | no árbirru rezerva Arssenio Correia.
Hanesan baibain no sai ona klutura ba futeból, bainhira árbitru fó orden hodi huu árbitu, jogadór sira lansa kedan kontra no atake hodi hatudu ida-idak nia tékniku no abilidade jihu iha kampu laran, ho ambisaun atu prodús golu ho lais.
Jogu entre ekipa rua ne’ebé nunka lakon iha Grupu A hahú ho intensidade aas iha adeptus atus ba atus nia oin. Nagardjo, ho komandu husi treinador Salomão Soares, hatudu kedas sira-nia planu jogu, defende iha bloku médiu 4-4-2, no esplora tranzisaun ofensiva lalais liuhusi vertikálidade.
Estratéjia ne’e fó rezultadu imediatu. Monu ba minutu lima (5), hafoin FIEL lakon bola iha terseira parte kampu adversáriu, Nagardjo lansa kontra-atake. Médiu sentrál Yohan Woppi (8) simu bola iha “half-space” direta, avansa metru balun la hetan presaun, no lansa xutu rasteiru ho pé direitu husi distánsia aprosimadamente kuaze metru 10. Bola ba kantu inferior eskerda guarda-rede FIEL nian ne’ebé avansa sala iha antesepsaun ho rezutadu 1-0 ba Nagardjo.
Golu sedu ne’e obriga FIEL ne’ebé lidera husi treinadór Hermelio da Conceição muda abordajen. Ekipa tenke asume risku barak liu, aumenta liña defeza, no domina pose bola liu husi sirkulasaun pasiente husi kraik.
Minutu restu husi primeira parte, FIEL ho eskema 4-3-3 tenta desmantela Nagardjo nia estrutura defeza. Ekipa buka kria superioridade numérika iha korredór sentrál liu husi movimentu rotasaun entre médiu-ofensivu no “falsu 9” Expedito Fuel, ne’ebé dala barak tun to’o liña klaran hodi lori defeza-sentrál adversáriu sai husi pozisaun.
Maibé, Nagardjo nia liña haat defeza no haat klaran disiplina tebes. Sira taka espasu entre liña, limita FIEL nia opsaun pasa vertikál, no obriga FIEL esplora kruza husi leten. Duelo individual entre Expedito Fuel no médiu-defensivu Nagardjo, Dramicio Moreira (15), sai xave. Moreira hetan kartaun kinur iha minutu 15 hafoin tackle siníku ba avansadu FIEL iha sirkulu klaran.
Ekipa FIEL kria oportunidade perigu rua liu husi bola parada, maibé finalizasaun sei laiha presizaun. Maske FIEL halo atake barak, maibé seidauk hetan oportunidade hodi prodús golu basa defeza Nagardjo la fó espasu, nune’e to’o minutu primeira parte termina rezultadu hela provizóriu 1-0.
Hakat ba segunda parte, ekipa rua kontinua lansa atake ba malu ho intensidade aas. FIEL buka meiu hotu oinsá halo empata jogu ne’e no karik iha oportunidade bele manán, maibé Nagardjo buka pozisaun atu aumenta tan golu, maibé mehi Nagardjo nian hela de’it hanesan mehi.
Mudansa signifikativu akontese iha inisiu segunda parte. FIEL aumenta ritmu no intensidade “gegenpressing” hafoin lakon bola. Iha minutu 50, jogada konstrui husi eskerda rezulta kruza ba área. Bola kona defeza Nagardjo nia liman ne’ebé loke an iha área penalidade.
Árbitru prinsipál Cándido Manuel Belo, ho pozisionamentu di’ak, la ezita aponta ba marka penalidade, desizaun ne’ebé hamosu protestu moderadu husi jogadór Nagardjo nian.
Expedito Fuel (11) asume responsabilidade. Ho kalma ne’ebé hatudu ninia esperiénsia tinan barak iha LFTL, Expedito Fuel dudu bola ba kantu inferiór direitu. Guarda-rede Nagardjo soe an sala ba sorin seluk muda rezultadu ba 1-1. Estádiu nakfera.
Golu ne’e muda kompletu momentum jogu. Adeptus iha sira hakilar no haklalak, halo Estádiu atu nakfera. FIEL ho morál aas kontinua fó presaun, enkuantu Nagardjo tenta reorganiza no responde liuhusi substituisaun hodi refreska liña atake.
Ho jogu abertu ba ekipa rua, intensidade duelu aumenta iha minutu 10 ikus. Árbitru tenke halo intervensaun barak. FIEL hetan kartaun kinur tolu konsekutivu: Flavio Ximenes (14) iha minutu 82 tanba halakon kontra-atake tátiku, Expedito Fuel (11) iha minutu 88 hafoin protesta maka’as desizaun falta, no Lorenço Ximenes iha minutu 90+2 tanba konsidera halo perda tempu durante kobransa lateral.
Maske ho presaun, skor kontinua 1-1 mantein to’o apitu finál. Empata ne’e signifika boot ba kontestu kompetisaun. FIEL mantein rejistu invensibilidade no lidera Grupu A ho pontu 7 husi jogu 3: vitória 2, empata 1. Ekipa Hermelio da Conceição nian hatudu katak sira iha profundidade mental atu rekupera husi situasaun dezvantajen.
Nagardjo FC, ho pontu 5 husi vitória 1 no empata 2, okupa pozisaun terseiru. Masei lakon oportunidade atu asalta lideransa, pontu ida iha terrenu adversáriu konsidera pozitivu husi treinador Salomão Soares.
Skuad FIEL
João Manise (1), Jenito Freitas (2), Delio Manise (4), Giovanio Freitas (16), Deonisio Lopes (24), Gabriel da Conceição (22), Flavio Ximenes (14), Angelmo Moreira (13), Eidio Manuel (6), João Ximenes (17), Expedito Fuel (11),
Jogadór Suplente
Inacio Tilman (20), Lourenço Ximenes (7), Pedro Rosa (23), Tarsisio Barreto (18), Saveriano Ximenes (26), Hernanio da Conceição (12), Angelmo Coli (25), Anibal da Cunha (15), Sergio Pereira (8), Crisanto Eko (3), Marques Cabral (23), Jose Sarmento (27), Elvis Gomes (19), Ranfim Boavida (5).
Skuad Nagardjo
Vicent Barenus (28), José da Costa (18), Bernardino de Sena (12), Hunsen Costa (25), Dramicio Moreira (15), Silvestre Gama (13), Yohan Woffi (8), Herman Yoku (6), Jorge Alves (7), Avrely Seubu (9), Richi Wally (10).
Jogadór Suplente
Valdinho Mouzinho (1), Pedro Belo (19), Domingos Ribeiro (2), Albertino Ribeiro (14), Aquelino Marques (17), Custodio dos Santos (24), Inocencio Pereira (11).
Jornalista : Hortêncio Sanchez
Editór : Cancio Ximenes
