DILI, 12 Juñu 2026 (TATOLI)–Nasaun uma-na’in Méxiku hahú semo aas hanesan manu makikit hodi liki Áfrika Súl ho rezultadu 2-0, iha jogu abertura Kopa Mundiál FIFA 2026 iha Grupu A ne’ebé hala’o iha Estádiu Mítiku Azteca, Sesta (12 Juñu 2026) madrugada.
Ho vitória ne’e, lori Méxiku lidera kedas Grupu A ho pontu 3, iha grupu ne’ebé kompostu mós husi Korea Súl no Repúblika Cheka.
Husi ema rihun ba rihun nia oin iha Estádiu Azteca, Méxiku hatudu kedas ambisaun boot husi minutu dahuluk. Presaun aas no jogu rápidu halo Áfrika Súl nia defeza sente todan.
La presiza hein kle’ur, golu hahú iha minutu sia (9), lansa husi atake rápidu iha parte karuk, bola tama ba área jogadór Julián Quiñones nia ain ne’ebé konsege finaliza ho kalma hodi muda rezultadu ba 1-0.
Hafoin golu, Áfrika Súl tenta responde liuhusi kontra-atake. Áfrika kria oportunidade di’ak rua liu husi jogadór Percy Tau no Themba Zwane, maibé guarda-rede Mexico nian salva. Áfrika laiha tan atake adekuadu rezultadu 1-0 mantein to’o entervallu.
Tama ba segunda parte, treinadór Méxiku nian halo mudansa tátika hodi kontrola liután área klaran, dominasaun ne’e fó rezultadu iha minutu 67 bainhira kaptaun Méxiku Raúl Jiménez simu bola krusa husi Jesús Gallardo no kabesa bola maka’as tama rede, rezultadu muda ba 2-0.
Áfrika Súl tenta hasa’e intensidade iha minutu ikus, maibé liña defeza Méxiku nian ne’ebé lidera husi César Montes la fó fatin. To’o arbitru huu apitu finál, rezultadu nafatin manetin 2-0.
Ho vitória ne’e, Méxiku la’ós de’it hetan pontu tolu dahuluk, maibé mós hamosu konfiansa boot ba adeptu sira katak Méxiku prontu atu hakat dook iha kopa mundiál ne’ebé sira sai uma-na’in hamutuk ho Estadu Unidu Amerika no Kanadá.
Entretantu, Jogu tuir mai ba Grupu A sei hala’o entre Korea Súl hasoru Repúblika Cheka, iha sesta dadeer tuku 11h00.
Jornalista : Hortêncio Sanchez
Editór : Cancio Ximenes
