DILI, 13 Juñu 2026 (TATOLI)–Estádiu Los Angeles iha Inglewood nakdoko bainhira selesaun nasionál Estadu Unidu Amérika (EUA) hatudu nia forsa hodi “dere” adversáriu Paraguai 4-1, iha jogu Kopa Mundiál 2026, ne’ebé hala’o iha Estádiu Los Angeles, Sábadu ne’e.
Bainhira jogu hahú, árbitru prinsipál Danny Desmond Makkelie, hú apitu hodi hahú jogu. Jogu ne’e la’ós úniku, tanba Paraguai mós hamosu ameasa oioin hosi kotuk iha minutu dahuluk sira. Presaun hosi parte rua ne’e aas tebes katak maski erru ki’ik liu bele muda jogu.
Iha jogu ne’e, Estadu Unidu nia dezempeñu hatudu kedan iha primeira parte hasoru Paraguai kontra-atake ho tékniku no abilidade ne’ebé rápidu tebes.
Durante jogu husi minutu ba minutu, EUA la’ós de’it domina kampu ho kontra-atake, maibé sira prenxe hodi blokeia adversária, maibé sira mós joga ho padraun ne’ebé klara, hodi determina vitória iha primeira parte.
Husi atake ne’ebé manas, jogadór amerikanu Weston McKennie ho nia kolega sira la hetan difikuldade hasoru Paraguai.
Maski Paraguai taka metin iha sira-nia parte klaran, sira konsege tama iha área defeza EUA nian, maibé susar atu sobu defeza EUA.
Bainhira bola barullu, iha atake Estadu Unidu nia nia leet, médiu Paraguai Damian Bobadilla marka autogolu iha minutu hitu (7) muda rezultadu ba 1-0. Nia halai bá iha kaixa penalidade Paraguaia nian, hodi tenta atu asegura pasajen ida hosi Weston McKennie, ne’ebé maka atake hosi parte loos. Infelizmente, nia ligasaun dezvia bola ba nia rede rasik.
Jogu sai manas liutan jogadór Folarin Balogun mosu hanesan anin prodús golu rua (2) fó vantajen ba EUA lidera provizória jogu 3-0 iha primeira parte hasoru Paraguai.
Golu rua ne’ebé Folarin Balogun marka iha minutu 31 no 45+5, hametin domíniu Estadu Unidu nian hasoru Paraguai.
Ekipa Uma-na’in manán vantajen tanba golu tolu hosi jogadór rua ne’ebé la hanesan. Sira lidera liuhosi autogolu ida hosi D Bobadilla. Hafoin ne’e, Estadu Unidu aumenta tan vantajen tanba golu rua husi Folarin Balogun.
Tama ba segunda parte, Paraguai kontinua konsentra ba jogu. Muda estraréjia iha liña klaran no parte karuk. Objetivu atu responde golu. Treinadór deside dada sai jogadór J. Alonso hodi hatama fali Maurício.
Estadu Unidu la fó fatin, blokeia metin lina bá liña, halo Paraguai susar atu ultrapasa hodi prodús golu. Paraguai la lakon esperansa, kontinua halo atake.
Estadu Unidu nia avansadu Folarin ho médiu Weston tenta atu ultrapasa ho kontra-atake, maibé Paraguai nia defeza blokeia metin.
Esforsu ne’ebé Paraguai halo la hela de’it hanesan esfirsu basá iha minutu 73 jogadór suplente, Maurício konsege utiliza nia kapasidade hodi lees rede EUA iha-ne’ebé muda rezultadu ba 3-1.
Estadu Unidu kontinua mantein de’it nia jogu to’o minutu jogu 90+8. Molok termina Gio Reyna marka tan golu ida hodi taka EUA nia vitória 4-1 no apitu ikus mós lian.
Husi rezultadu ne’e, vitória hela ba EUA hodi rekolla pontu tolu (3) iha grupu D no túr liu iha pozisaun leten. Grupu D kompostu husi EUA, Paraguai, Túrkia no Austrália. Enkuantu, jogu ba Túrkia no Austrália sei hala’o iha tempu tuirmai.
EUA-4-2-3-1
(24) M. Freese, (16) A. Freeman, (3) Chris Richards, (13) Tim Ream, (5) Antonee Robinson, (17) Malik Tillman, (4) Tyler Adams, (2) Sergino Dest, (8) Weston McKennie, (10) Christian Pulisic, (20) Folarin Balogun
Paraguai-4-4-2
(19) J. Enciso, (9) Antonio Sanabria, (10) Miguel Almiron, (16) D. Bobadilla, (14) Andres Cubas, (8) D. Gomez, (6) J. Alonso, (3) Omar Alderete, (15) Gustavo Gomez, (4) J. Cáceres, (12) O. Gill.
Jornaliata: Hortêncio Sanchez
Editór: Xisto Freitas da Piedade
