DILI, 13 Juñu 2026 (TATOLI)–Ekipa ho naran estimadu AD SLB Laulara susesu iha nia jornada daruak. Susesu ida-ne’e atinje hafoin hikis adversáriu FC Portu Taibessi 2-0, iha jogu kontinuasaun Primeira Divizaun Liga Futeból Timor-Leste (LFTL) époka 2026 ne’ebé halao iha Estádiu Munisipál Dili, Sábadu kalan.
Jogu ne’ebé lidera husi árbitru Pedro Carvalho, bainhira fó orientasaun liuhusi hú apitu dahuluk, jogadór sira halo kedan kontra-atake ba malu tuir tékniku no abiliade ekipa idaidak nian.
Jogu ne’e hahú ho ritmu aas, iha-ne’ebé SLB mak domina liu bola. Minutu lima (5) de’it jogadór FC Portu Taibessi nia defeza Daniel Appiah haka’as an atu tebe sai bola iha liña oin Taibessi nian, maibé la kontrola ho di’ak, bola semo fali ba nia rede rasik hodi hamosu golu, nune’e rezultadu golu nakfilak kedan ba 1-0.
SLB hala’o nia jogu ho formatu 4-3-3. Ekipa ne’ebé idéntiku ho manu makikit ne’e, dalabarak uza bola aas hanesan makikit be semo aas. Enkuantu, Taibessi joga ho kalma no halo jestaun bola ho modelu orizontál.
Ho forsa ne’ebé la dook malu, to’o minutu primeira parte termina la rezulta tan golu ruma, maski SLB halo ameasa maka’as ba rede Taibessi. Xutu barak la kona alvu. Apitu lian minutu deskansa nian to’o mai daudaun. Jogu primeira parte termina ho rezultadu afavór ba SLB 1-0.
Tama bá segunda parte, Portu Taibessi buka hela dalan atu fó resposta, maibé liña defeza SLB ho guarda-rede siak hanesan lafaek ne’ebé hein metin lagoa hodi la fó leet ba tentativa sira husi adversáriu atu hamosu golu.
Jogu sai nakloke iha minutu bá minutu. Presaun SLB fó rezultadu iha minutu 86 bainhira Talo Soares, jogadór estranjeiru aproveita kontra-atake hodi xuta bola liu guarda-rede Portu Taibessi nia liman klaran, bola tama liu rede laran. Golu ne’e aumenta tan títulu 2-0 ba SLB. Golu ne’e taka kedan Portu Taibessi nia esperansa atu foti pontu no fahe pontu. Pontu tolu hela metin ho SLB ona.
To’o apitu finál lian, rezultadu mantein 2-0. SLB lori pontu tolu (3) kompletu, enkuantu Portu Taibessi tenke servisu maka’as iha jogu sira tuirmai hodi gaña pontu.
Husi rezultadu ne’e, lori ona SLB túr aas liu iha tabela klasifikasaun provizória ho pontu neen (6), husi jogu dala rua. Entretantu, Portu Taibessi seidauk iha pontu.
Skuad Porto Taibesse
Ayumu Yamaguchi (1), Daniel Appiah (18), Aúrio da Costa (22), Júlio Abel (4), Lázio Piedade (77), Gregório delfino Silva (10), Aldo Loidala Amaral (21), Cláudio Fábio Martins (17), Jardel Piedade (9), Muhamad Gaushiroxi (13), M. Akram Albar Hamdan (14).
Jogadór Suplente:
Babtisa Koren Ola (12), Juvêncio Soares (20), Carol Waitila Moreira (3), Raul Cama Seran (47), Jerico Piedade (45), Deonísio da Silva (15), Andre Correia Soares (18), Pascoal Alves Ximenes (6), Raimundo Alves (23), Patrício da Silva (8), Nolio Gomes Gonçalves (11), Alexandre Vong Guterres (7), Gregorinho Moundias (24).
Skuad SLB
Filoneto Nogueira (1), Flomeno da Costa (18), Pedro Paulo Vicente (2), Jonatas Pereira (15), Kwadwo Dompson (9), Fazer Hurtado (99), Moudouzo de Lima (10), João Soares Diamantes (16), Martinho Belo (88), Thawan Oliveira (4), Fábio Christian Cotinho (93).
Jogadór Suplente:
Januario Abi (30), Norbert Gonçalves (22), Fernando de Carvalho (32), Alberto da Silva (13), Germano da Silva (14), Leonio Freitas (16), Luís Berdila da Silva (8), Totánio Amaral (11), Ayomide Peter Ramos (99), Serafim D. S. Brito (17), Jhon Frith de O. Ornai (7), Vabio Canavaro Pires (23), Jonel Sarmento (25), Marcos Barros (23), Muhamad Karozi (23).
Jornalista: Hortêncio Sanchez
Editór: Xisto Freitas da Piedade
