VIKEKE, 15 Juñu 2026 (TATOLI)—Agrikultór husi Suku Vessoru, Postu Administrativu Uatulari, Munisípiu Vikeke, Agustinho Fernandes, informa akontesmentu udan boot iha fulan-Maiu liubá afeta ba kanal irrigasaun Daradau ne’ebé lokaliza iha Suku Vessoru rai nakonu tiha entaun bee la bá natar, nune’e Ministériu Agrikultura, Peska, Pekuária no Floresta (MAPPF) destaka ekipamentu pedidu halo ona normalizasaun.
Reprezantante natar na’in ne’e hatutan, kuaze semana ida resin bee la bá natar no natar balun atu kari mós labele tanba bee laiha, maibé husi MAPPF nian apoia ba ekipamentu pezadu mak foin halo normalizasaun filafali irrigasaun referida.
“Normalizasaun ne’e ami hamutuk ho operadór eskavatór no konklui ona iha semana kotuk. Daudaun ne’e, fornese fali ona bee ba ami-nia natar,” Agostinho Fernades ba TATOLI iha Suku Vessoru Vila, Segunda ne’e.
Nia relata rai taka ne’e kuaze metru 54 resin, maibé kuandu udan boot akontese rai sei taka fila fali tanba iha parte foho-hun ne’e laiha morru protesaun ruma satan rai.
Entretantu, Diretór Servisu Agrikultura Munisípiu Vikeke, Olívio S. Fretas haktuir, kona-ba kria morru protesaun daudauk ne’e seidauk iha orsamentu ruma hodi tau ba konstrusaun morru protesaun sira, maibé ba tinan ida-ne’e irrigasaun sira-ne’ebé mota estraga no hamoos sedimentasaun ruma MAPPF apoia eskavatór hodi halo normalizasaun.
Tuir dadus, natar parte Daradau purvolta ektare 340-resin. Daudaun ne’e agrikultór sira uza ba halo natar no benefísia populasuan Vessoru kompostu husi aldeia hitu mak hanesan Balabasiba, Mau-Boru, Kulu-Dere, Baho-O, Uani-Uma, Baha-Buga, no Matau ho totál populasaun 1.519.
Jornalista: Vitorino Lopes da Costa
Editór: Xisto Freistas da Piedade
