VIKEKE, 08 Juñu 2026 (TATOLI)—Pontu Fokál Ra’es Hadomi Timor Oan (RHTO) Munisípiu Vikeke, Natalino Pinto, informa Administradór Postu Vikeke Vila ho inisiativa konstroe ona rampa ka asesibilidade iha edifísiu Administrasaun Postu Vikeke Vila hodi fasilita ema ho defisiénsia sira asesu ba postu.
“Kona-ba konstroe dalan asesibilidade ba ema ho defisiénsia nian ne’ebé foin lalais konstroe iha edifísiu Postu Vikeke Vila ne’e. Inisiativa maihusi ita-nia administradór rasik hodi orienta estudante estajiáriu sira husi Universidade da Paz (UNPAZ) konstroe atu fasilita ita-nia maluk sira asesu ba edifísiu postu nian,” Natalino Pinto ba TATOLI iha Postu Vikeke Vila, Segunda ne’e.
Nia dehan sidadaun hotu iha direitu asesu ba administrasaun públika sira, maibé iha edifísiu públiku sira mak laiha dalan asesibilidade ka rampa ba ema ho defisiénsia sira, entaun sai barreira ida ba sira atu asesu.
Natalino subliña rampa ba ema ho defisiente sira-ne’e sai importante, ne’ebé RHTO mós iha programa ba asuntu asesibilidade ne’ebé sempre halo koordenasaun ho parte edifísiu públiku sira.
“Entre edifísiu postu lima iha Munisípiu Vikeke, Postu Vikeke Vila mak dahuluk konstroe asesibilidade ne’e. Nune’e, bá-oin ha’u sei kontinua koordena ho ita-nia administradór sira husi postu haat hanesan Uatukarbau, Lakluta, Ossú no Uatulari atu konstroe hotu, atu ita-nia maluk defisiente sira bele asesu hodi trata asuntu ruma karik bele fásil,” nia informa.
Nia esplika konstrusaun rampa ne’e hala’o husi parte autoridade postu, estudante UNPAZ no RHTO.
Rampa ne’ebé konstroe ne’e, Mariano tenik, medida metru tolu (3) no nia luan metru 120.
Daudaun ne’e, edifísiu públiku sira-ne’ebé estabelese ona dalan asesibilidade ka rampa ba ema defisiente sira mak hanesan edifísiu Autoridade Munisípiu Vikeke, Rejistu Notariadu, STAE, eskola EBC Kabira-Oan, enkuantu edifísiu sira seluk seidauk.
Tuir dadus, ema ho defisiénsia hosi Munisípiu Vikeke hamutuk 3.416 ne’ebé kompostu husi defisiénsia matan, tilun, ain no seluk tan.
Jornalista: Vitorino Lopes da Costa
Editór: Xisto Freitas da Piedade
