DILI, 16 Juñu 2026 (TATOLI)–Boxista timoroan el matadór Délio Mouzinho asegura vítoria ida tan iha ninia kareira profisionál, hafoin halakon boxista indonéziu Burhanudin Aduraf iha eventu boxe internasionál One Two Fight, ne’ebé realiza iha domingu (14 Juñu 2026) ne’e iha Yogyakarta, Indonézia.
Notísia Relevante: Boxista Delio derrota ho TKO iha Austrália
Luta ne’e, iha kategoria pezu bantam, kompostu husi ronda haat ho durasaun minutu tolu kada ronda, no sai parte husi kalendáriu kompetisaun internasionál, hanesan luta preparatória ba atleta timoroan ne’e.
Délio Mouzinho fila hikas ba ring hafoin nia hetan eliminasaun iha fulan-Abríl kotuk ne’e bainhira hasoru boxista australianu Callum Peters iha Nova Gales Sul, Austrália.
Ho esperiénsia ne’ebé barak liu, Délio hahú luta ne’e ho presaun maka’as husi ronda dahuluk. Nia impoin ninia ritmu no domina adversáriu ne’e iha aspetu tékniku, enkuantu Burhanudin Aduraf sei hahú hela ninia kareira iha boxe profisionál.
Tuir ekipa tékniku Klubu Boxe El Matadór, objetivu luta ne’e la’ós de’it atu hetan rezultadu di’ak, maibé mos atu avalia atleta nia kondisaun fízika no dezenvolvimentu tékniku durante faze krusiál preparasaun ida-ne’e.
Ho vítoria ida-ne’e, Délio Mouzinho konsolida tan ninia pozisaun hanesan ema ida husi boxista prinsipál sira Timor-Leste nian iha sirkuitu internasionál no halo progresu iha ninia rekuperasaun hafoin eliminasaun ne’ebé nia sofre iha Austrália.
Ninia regresu ba kompetisaun akontese iha momentu ne’ebé atleta ne’e intensifika hela preparasaun ba luta títulu OPBF (Oriental and Pacific Boxing Federation) iha kategoria osan-mutin, ne’ebé marka ona ba fulan-Jullu iha Kalimantan Sul, Indonézia, hasoru boxista lokál Saroha Lumbantobing.
Luta ne’e konsidera hanesan etapa importante ba Délio atu hametin ninia pozisaun iha palku boxe profisionál asiátiku.
Notísia Relevante: Assanami husu Boxista Delio Mouzinho labele lakon esperansa
Jornalista : Afonso do Rosário (Tradutór: Cidalia Fátima)
Editora : Isaura Lemos de Deus
