DILI, 16 Abríl 2026 (TATOLI)–Vise-Primeiru-Ministru, Mariano Assanami Sabino, husu ba Boxista Delio Mouzinho atu labele lakon esperansa hodi kompete nafatin iha mundu Boxe tanba lakon ne’e hanesan esperiénsia ida atu esforsu aan ba futuru.
Notísia Relevante: Boxista Delio derrota ho TKO iha Austrália
“Ami ohin mai hasoru ita-nia Vise-Primeiru-Ministru, nia ko’alia mai ha’u, husu ha’u labele lakon esperansa, liuhusi kompetisaun ida lakon no ida mak manán. Nia husu ha’u esforsu an nafatin no sei manán iha loron ida,” Boxista Delio hateten ba Agência TATOLI hafoin ramata enkontru ho Vise-PM Assanami iha Palásiu Governu, ohin.
Tanba ne’e, nu’udar atleta nia hato’o agradeseimentu ba Vise-Primeiru-Ministru nia liafuan motivasaun ne’e, hanesan osan-mean ida ba nia atu esforsu nafatin hodi lori Timor-Leste nia naran ba mundu.
Iha sorin seluk, Treinadór El-Matador, Abilio Orlando dos Santos, hateten hasoru malu ho Vise-Primeiru-Ministru ne’e fó korajen no motivasaun ba Delio oinsá labele lakon esperansa.
“Hasoru malu ne’e oinsa Vise-Primeiru-Ministru atu fó korajen no apoiu nafatin Delio, atu nia bele hamriik fila-fali, treinu nafatin hodi prepara ba futuru nian,” Abilio dehan.
Nia hatutan, motivasaun ne’ebé lideransa jerasaun foun ne’e hato’o ba boxista Delio bele sunu liutan Delio nia vontade atu prepara an maka’as liutan ba oin.
“Derota ne’ebé foin lalais Delio hetan, sai lisaun no matéria ida ba ita atu aprende ba oin. Derota ida-ne’e la’ós atu hamate ita-nia vontade, maibé sunu ita-nia vontade. Hanesan treinadór, ha’u sei hamriik nafatin ho boxista no ekipa hotu tanba ita-nia misaun seidauk termina. Objetivu ida de’it mak lori Timor ba mundu,” nia dehan.
Jornalista : Hortencio Sanchez
Editór : Cancio Ximenes
