DILI, 19 Juñu 2026 (TATOLI) – Komisaun C iha Parlamentu Nasionál, ne’ebé trata Asuntu Finansa Públika, hahú halo diskusaun iha faze espesialidade ba proposta Lei númeru 22/VI/(2ª) kona-ba Rejime Jerál Sistema Finanseiru no Atividade Bankária.
Diskusaun ne’e lidera direta husi Prezidente Komisaun C, Cedelízia Faria dos Santos, ne’ebé hetan akompañamentu husi membru Komisaun sira no Prezidente Parlamentu Nasional, Maria Fernanda Lay.
Antes tama ba faze diskusaun espesialidade, Komisaun C halo ona audiénsia públika no aprova ona proposta iha faze jeneralidade iha plenária.
Lejizlasaun ne’e importante tebes tanba sai regulamentu foun hodi substitui regulamentu UNTAET sira ne’ebé mai husi tinan 2000.
Lei ne’e atu kontrola sistema bankáriu iha Timor-Leste, inklui kondisaun atu harii banku foun tuir padraun legál ne’ebé determina.
Aleinde ne’e, atu regula sistema dijitalizasaun finanseira, tanba sistema pagamentu no transferénsia osan agora laiha dependénsia ba osan konstante, maibé liuhusi sistema dijitál. Lejizlasaun ne’e mós trata kona-ba prevene brankeamentu kapitál sira.
Proposta lei ne’e iha artigu hamutuk 286, iha diskusaun espesialidade deputadu sira aprezenta proposta alterasaun hamutuk 30. Alterasaun hirak ne’e ho objetivu atu halo korresaun ki’ik sira, no mós hamenus artigu balun ne’ebé konsidera la nesesáriu iha proposta lei orijinál.
Diskusaun ne’e partisipa mós husi Ministru Planeamentu no Investimentu Estratéjiku (MPIE), Gastão de Sousa, Vise-Ministra Finansa, Regina de Jesus, Vise-Ministru ba Asuntu Parlamentár, Adérito Hugo da Costa, no Governadór Banku Sentral, Hélder Lopes, ho ekipa.
Notísia relevante: Parlamentu aprova Rejime Jerál Sistema Finanseiru no Atividade Bankária
Jornalista: Nelson de Sousa
Editora: Maria Auxiliadora
