DILI, 22 Juñu 2026 (TATOLI)—Alin husi Antigu Prezidente Repúblika no Atuál Prezidente Partidu FRETILIN, Francisco Guterres ‘Lú Olo’ Domingos Guterres, sente triste tanba lakon maun no aman di’ak ida.
“Ita hotu hatene ita-nia maun, ita-nia aman laiha ona, neste momentu ami família mós triste, ami agradese ba solidaridade tomak husi parte Governu, partidu no ba povu tomak nia apresiasaun boot ba ita-nia aman ida-ne’e nia mate. Triste boot ba família, triste boot mós ba nasaun no povu tomak,” Domingos Guterres, hato’o ba Jornalista sira iha Rezidénsia Farol, Segunda ne’e.
Família halo ona koordenasaun ba transladasaun mate-isin Lú Olo husi Malázia mai Dili iha loron 23 Juñu.
“Aban mak sai to’o iha Timor mais nia oráriu tomak seidauk iha data fiksa,” Alin husi Saudozu, informa.
Nia dehan, família sei hein desizaun husi Saudozu nia kaben, kona-ba prosesu no sekuénsia funerál.
Notísia relevante : Líder istóriku Lú-Olo hakotu nia peregrinasaun iha Ospitál Malázia
Nia haktuir, Lú Olo hakotu iis iha Ospitál Malázia iha tuku 22:00 kalan oras lokál nian. Família daudaun ne’e seidauk hatene Saudozu moras saida to’o hakotu iis.
“Médiku sira mak hatene. Neste momentu ami prepra de’it kondisaun mínimu hodi simu nia mate-isin mai, ida-ne’e mak halo hela daudaun ne’e,” nia tenik.
Domingos konta tuir, Saudozo sai husi uma Farol bá trata nia saúde iha Ospitál Nasionál Guido Valadares, nune’e Doutór sira komunika hodi halo tratamentu avansadu iha Malázia, nune’e iha loron 23 Maiu Lú Olo no nia kaben, Cidália sai husi Dili bá Malázia.
Nia dehan, Saudozo la fó hatene ba família kona-ba nia moras tanba Lú Olo nia personalidade hanesan ema la ko’alia barak.
“Ami simu informasaun katak nia mate, nu’udar família ami triste no ida-ne’e nu’udar família hotu-hotu ne’ebé iha la’ós família ida-ne’e maibé kuaze povu tomak triste tanba nu’udar ema líder ida,” nia katak.
Tuir observsaun Ajénsia TATOLI iha terrenu, nota katak veteranu ativu sira iha instituisaun FALINTIL-Forsa Defeza Timor-Leste no Dirijente Partidu FRETILIN hahú hakat mai Saudozu nia iha Rezidénsia iha Farol.
Veteranu ativu F-FDTL ne’ebé mai iha Rezidénsia Farol mak hanesan Lorenço José Cabral ‘Aquito Tanque de Guera’ Direjente Partidu FRETILIN mak hanesan Adjuntu Sekretáriu Jerál, Flávio Maria da Silva, Deputadu Bankada FRETILIN no seluk tan.
Jornalista : Natalino Costa
Editora : Julia Chatarina
