DILI, 01 Jullu 2026 (TATOLI) – Ministru Defeza, Donaciano do Rosário Gomes, halo aprezentasaun ida ba Konsellu Ministrus kona-ba projetu konstrusaun ba Ospitál Militár FALINTIL-Forsa Defeza Timor-Leste (F-FDTL) nian, ne’ebé dezenvolve iha ámbitu kooperasaun bilaterál entre Timor-Leste no Repúblika Populár Xina.
Iha aprezentasaun ne’e, misaun téknika xineza ne’ebé responsavel ba serbisu preparasaun ba projetu ne’e aprezenta karakterístika prinsipál ba futuru Ospitál Amizade Timor-Leste-Xina, ne’ebé sei harii besik iha Ministériu Defeza no Kuartél-Jenerál F-FDTL, iha Díli.
Projetu ne’e inklui ospitál jerál ida ho kapasidade kama 100, área maizumenus metru kuadradu 10.500, edifísiu prinsipál ida ho andár ualu, no mós edifísiu apoiu sira, ne’ebé kompleta ho teknolojia médika moderna no preparadu atu fornese servisu konsulta esterna, kuidadu emerjénsia, internamentu, imajiolojia, análizes klínikas no kuidadu intensivu.
Ministru Donaciano mós halo aprezentasaun ida kona-ba kriasaun Komisaun Interministeriá ida hodi halo supervizaun no akompañamentu ba Konstrusaun Futuru Ospitál Militár ne’e.
Nia dehan projetu estratéjiku ida-ne’e ho objetivu atu reforsa kapasidade operasionál F-FDTL, komplementa servisu sira Servisu Nasionál Saúde nian, hadi’a resposta ba emerjénsia, katástrofe no krize umanitária, promove formasaun no dezenvolvimentu medisina militár, hamenus dependénsia ba tratamentu sira iha rai-li’ur, no mós fó benefísiu ba populasaun sivíl, hodi kontribui ba reforsu kapasidade nasionál iha área saúde no dezenvolvimentu ekonómiku nasaun nian.
Rekorda katak iha 20 Agustu, tinan kotuk, iha selebrasaun aniversáriu-50 FALINTIL, Governu Xina ho Timor-Leste asina memoradu kona-ba konstrusaun ospitál militár ne’e.
“Kuaze tinan ida liu tiha no ohin ita mai aprezenta ba Governu kona-ba konseitu dezeñu ne’ebé Governu Xina sira propoin, no Governu simu ona konseitu ne’e”, Ministru Defeza hatoo ba jornalista sira iha Palásiu Governu, ohin.
Nia dehan tuir planu, projetu ne’e sei lansa iha tinan oin, tamba tinan ida-ne’e sira sei foku ba dezeñu no buka konsultór. “Enkuantu kona-ba orsamentu ne’e doasaun husi Governu Xina,” Ministru ne’e akresenta.
Donanciano infroma katak projetu konstrusaun ospitál ne’e sei termina antes Timor-Leste sai uma-na’in ba ASEAN iha 2029.
Jornalista: Alexandra da Costa
Editór: Filomeno Martins
