AILEU, 07 Jullu 2026 (TATOLI)—Governu liuhusi Ministériu Dezenvolvimentu Rurál no Abitasaun Komunitária (MDRHC, sigla portugés) hamutuk ho Universidade Sunshine Coast Austrália (UniSC) kontinua empodera benefisiáriu sira liuhusi workshop kona-ba fortalesimentu kapasitasaun ba dezenvolvimentu rurál no empreendedorizmu iha Suku Aissirimou, Postu Administrativa Aileu Vila, Munisípiu Aileu.
Objetivu husi atividade ne’e atu hametin kapasidade institusionál no komunidade nian iha área dezenvolvimentu rurál, empreendedorismu, no inovasaun ba transformasaun rurál sustentável iha Timor-Leste.
Tuir Xefe Gabinete-VPM-MDRHC-MCAS, Arantes Isac Sarmento, hateten formasaun ohin ne’e ho objetivu atu empodera grupu benefisiáriu sira iha programa dezenvolvimentu rurál, ne’ebé Governu servisu hamutuk ho Universidade Sunshine Coast Austrália.
Formasaun ne’e bele haforsa liután sira-nia koñesimentu liuliu bele hetan líder lokál ne’ebé proativu hodi halo investimentu ba sira-nia grupu, tanba mundu agora mudansa nesesidade ema-nian la hanesan ho tempu sira uluk.
“Tanba ne’e mak ami esforsu hodi empodera grupu benefisiáriu ka komunidade nia koñesimentu ida-ne’e Governu nia alternativa atu investe ema hodi hadia ekonomia familiar,” Xefe Gabinete ne’e informa ba jornalista sira iha sentru joventude Aileu, ohin.
Programa ida-ne’e, nia dehan, la’ós foin mak implementa iha Aileu maibé halo ona rotativa ba munisípiu sira seluk no mudansa ne’ebé iha mak dezenvolvimentu rurál hanesan kuda ai-horis, haki’ak animál, halo produsaun ba produtu lokál no seluk tan.
“Tanba ne’e, ha’u husu ba partisipante sira atu aproveita di’ak oportunidade ne’e hodi halo diversifikasaun ekonomia iha grupu, sosiedade no família,” nia apela.
Diretór Jerál Dezenvolvimentu Rurál, Filipe Cardoso Vieira, reforsa katak programa ne’ebé hala’o durante loron rua ne’e ninia alvu prinsipál mak atu empodera ka investe rekursu umanu, buka lideransa ne’ebé di’ak hodi dezenvolve sira-nia grupu rasik (dezenvolvimentu rurál).
“Programa ne’e ami-nia alvu ba partisipante na’in-50, maibé tanba balun hela dook entaun lato’o alvu ne’ebé ita hakarak. Entaun, ema hirak ne’ebé ohin partisipa ne’e mak sei tuir formasaun durante loron rua hahú ohin to’o aban,” Diretór Jerál ne’e relata.
Iha formasaun kona-ba empreendedorizmu ne’e hodi halo jestaun kona-ba subvensaun públiku ne’ebé apoiu husi MDRHC programa revitalizasaun komunitáriu ba komunidade iha área rurál hodi sai inovadora hodi kontribui ba kreximentu ekonomia iha nivel rurál.
“Tanba ne’e, matéria sira-ne’ebé ami prepara relevante duni ho ita-nia grupu benefisiáriu sira oinsá promove no hasa’e rendimentu iha grupu atu fó benefísiu ba família,” nia hateten.
Enkuantu iha workshop ba etapa dahuluk nian sei ko’alia kona-ba tópiku tolu mak hanesan kontestu ekonómiku, Governaun tradisionál no dezenvolvimentu rurál iha Timor-Leste: Foku ba munisípiu Aileu.
Tópiku seluk mak hanesan mMentalidade empreendedora: Hanoin ho maneira foun atu kria oportunidade, dezenvolvimentu rurál iha Timor-Leste: Sustentábilidade no redusaun ki’ak liuhusi dezenvolvimentu komunitáriu integradu tuir objetivu dezenvolvimentu sustentável.
Partisipante sira-ne’e kompostu husi funsionáriu offisiál hosi MDRHC no grupu benefisiáriu sira iha atividade oioin, (artesanatu, agrikultór) no atividade ne’e sei remata iha loron aban (08/07).
Jornalista : Alexandra da Costa
Editor : Cancio Ximenes
