VIKEKE, 08 Jullu 2026 (TATOLI)—Komandante Autoridade Protesaun Sivíl (APC-sigla portugeza), Cirílio Gomes, hateten APC planeia ona sei estabelese Postu Bombeiru ida iha Postu Administrativu Uatukarbau, Munisípiu Vikeke, hodi kobre ba postu tolu.
“Ami iha ona planu ida atu estabelese tan Postu Bomberu ida iha Uatukarbau, nune’e mosu inséndiu no dezastre naturál ruma fásil kobre ba postu tolu hanesan Uatukarbau, Uatulari no Postu Ilomár (Munisípiu Lautéin),” Cirílio Gomes ba TATOLI iha Postu Vikeke Vila, Kuarta ne’e.
Nia dehan, daudaun ne’e, Bombeiru lokalizadu iha Munisípiu Vikeke, entaun mosu akontese inséndiu no lalubur (bee-sa’e/inundasaun) difísil to’o iha postu ne’ebá hodi halo intervensaun.
“Husi Vikeke Vila ba Postu Uatulari no Uatukarbau distánsia ne’ebé dook no kondisaun estrada mós seidauk di’ak, entaun difikulta ita hodi to’o iha fatin akontesimentu dezastre naturál,” nia akresenta.
Cirílio informa estabelese postu ida iha Postu Uatukarbau ne’e sei destaka karreta ida bá ne’ebá atu fasilita ekipa bomberu sira bainhira mosu dezastre naturál ruma.
“Nune’e, planu estabelese Postu Bombeiru iha Postu Uatukarbau ne’e ita sei rekruta funsionáriu foun hamutuk na’in-12. Prosesu rekrutamentu sei akontese iha tinan 2027,” nia esplika.
Daudaun ne’e, nia tenik, ekipa Unidade Bomberu iha Munisípiu Vikeke hamutuk na’in-17 ne’ebé ativu halo atendimentu ba kazu dezastre naturál sira-ne’ebé akontese iha Munisípiu Vikeke no fasilidade karreta tolu kompostu husi karreta tula tanke ida, karreta móvel ida no karreta PCL foun ida.
Jornalista: Vitorino Lopes da Costa
Editór: Xisto Freitas da Piedade
