DILI, 07 Jullu 2026 (TATOLI)—Polísia Nasionál Timor-Leste (PNTL) asegura ona suspeitu na’in-rua hodi submete ba investigasaun tanba suspeitadu envolve iha konfrontu iha Aitarak-Laran, Suku Kampung Alor, Postu Administrativu Dom Aleixo no iha Raikotu.
Komandante PNTL Munisípiu Dili, Komisáriu Asistente Polísia Orlando Gomes, informa, konfrontu iha Aitarak-Laran ne’e akontese depois adeptus futeból sira akompaña jogu Kopa Mundiál entre Portugal no España, enkuantu konfrontu iha Raikotu ne’e akontese tanba suspeitu tenta atu naok sasán iha karpinteiru.
“Konfrontu iha Aitarak-Laran ne’e estraga kareta carry ida no motór tolu no iha Raikotu ne’e suspeitu hetan taa iha liman loos husi patraun, ne’ebé suspeitu tenta atu naok nia sasán ne’e. Nune’e konfrontu iha fatin rua ne’e ita asegura suspeitu na’in-rua ba prosesu investigasaun tanba sira-nia aktu ne’e krime,” Komisáriu Asistente Polísia Orlando Gomes, hato’o iha ninia knaar fatin, Eskuadra Dom Aleixo, Tersa ne’e.
Notísia relevante : PNTL konfirma Ajente Polísia feto mate tiru-an, daudaun hein rezultadu investigasaun
Komadante PNTL Munisípiu Dili esplika, akontesimentu iha Aitarak-Laran ne’e vítima ne’ebé nia sasán hetan estragu mai ona Eskuadra Dom Aleixo hodi presta deklarasaun no suspeitu ho vítima tenta rezolve problema tuir família, maibé PNTL kontinua prosesu normál tanba konsidera krime.
Nune’e mós, kazu iha Raikotu kontinua ba prosesu normál hotu, tanba antes ne’e vítima halo uluk ona keixa kona-ba nia sasán lakon.
Nia esplika, antes ne’e na’in ba karpinteiru mai hato’o uluk ona keixa kona-ba nia sasán lakon hanesan osan $800, odamatan boot 15, janela tolu, ortóriu rua, nomós sasán seluk tan. Hodikalan foin konsege kaer toman suspeitu ne’ebé durante ne’e foti-subar sasán.
“Kazu iha Raikotu ne’e, suspeitu ida tenta atu tama ba iha Mebel (karpinteiru) laran, ba patraun nia kuartu ho objetivu ba naok sasán, maibé la konsege tanba patraun kaer toman no foti katana taa nia liman loos, iha kazu ida-ne’e depois suspeitu nia kolega sira iha Raikotu rona mak mai tuda malu, maibé depois Patrullamentu to’o iha fatin hakalma situasaun no lori suspeitu ida kanek mai kurativu iha klínika Kampung Baru no kontinua ba prosesu investigasaun,” nia relata.
Komandante PNTL Munisípiu Dili esplika, kazu iha Raikotu ne’e keixa kontra keixa tanba suspeitu ne’ebé tenta atu foti-subar sasán ne’e mós sai vítima tanba hetan taa, no kazu ida-ne’e konsidera tipu furtu agravadu, nune’e nia prosesu kontinua la’o ba oin.
Jornalista : Natalino Costa
Editora : Julia Chatarina
