DILI, 08 Jullu 2026 (TATOLI) – Prezidente Repúblika Timor-Leste, José Ramos-Horta, no Primeiru-Ministru, Xanana Gusmão, simu diretamente Prezidente Repúblika Indonézia Dalimak, Megawati Soekarnoputri, iha Aeroportu Internasionál Prezidente Nicolau Lobato, ohin, ne’ebé mai vizita Timor-Leste.
Prezensa Megawati iha país ne’e nu’udar nia vizita datoluk, bazeia ba konvite husi Prezidente José Ramos-Horta. Antes ne’e, nia mós vizita ona Dili iha loron 09 Agostu 1999, nu’udar Prezidente Partai Demokrat Indonesia Perjuangan (PDI-P), molok konsulta populár, no depois mai fali iha 20 Maiu 2002, hanesan Prezidente Repúblika Indonézia hodi tuir serimónia ne’ebé marka Restaurasaun Independénsia Timor-Leste nian.
Tuir observasaun, iha tuku 15h00, atmosfera akollimentu ida sai evidente iha rota ne’ebé hahú husi Aeroportu Internasionál Prezidente Nicolau Lobato to’o Otél Palm Springs. Estudante atus ba atus husi eskola oioin hamriik iha estrada-ninin, lori bandeira Timor-Leste no Indonézia nian hodi simu Sukarno nia oan-feto, Proklamadór no Prezidente dahuluk Repúblika Indonézia nian.
Prezidente Ramos-Horta, Primeiru-Ministru, Xanana Gusmão, Vise-Primeiru-Ministru ne’ebé hala’o knaar mós nu’udar Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, Ministru Negósiu Estranjeiru no Kooperasaun, Bendito dos Santos Freitas, hamutuk ho ofisiál Governu no Parlamentu Nasionál halibur hamutuk iha aeroportu VIP hodi hein Megawati nia xegada.
Jet privadu (PK-KAS) ne’ebé tula Megawati ho nia delegasaun tun iha Aeroportu Internasionál Prezidente Nicolau Lobato pur volta tuku 15h49 oras lokál. Bainhira tun husi aviaun, Megawati simu benvindu ho resesaun serimónia ida ne’ebé hatudu nahe karpet mean, Megawati la’o no simu ho dansa tradisionál Timor-Leste nian ne’ebé hautudu husi Grupu Kulturál Karketu.
Hafoin ida-ne’e, labarik-feto na’in-rua hatais traze tradisionál Timor-Leste nian entrega ai-funan ba Megawati molok akompaña nia ba salaun VVIP aeroportu. Iha Megawati nia kotuk, haree Prezidente Ramos-Horta no Primeiru-Ministru Xanana Gusmão la’o hamutuk tama bá sala VVIP nian ba serimónia ofisiál benvindu nian.
Iha resintu aeroportu nian to’o estrada boot sira, bandeira Timor-Leste no Indonézia dada iha dalan-dalan, iha Rotunda Prezidente Nicolau Lobato no to’o iha Otél Palm Springs. Banner sira ne’ebé lori mensajen “Benvindu mai Timor-Leste, Megawati Soekarnoputri” hatudu mós iha pontu oioin hodi fó onra ba distintu konvidadu.
Jornalista sanulu-resin hosi mídia nasionál no internasionál oioin halibur iha área iha entrada VVIP nia oin hodi halo kobertura ba Megawati nia xegada. Iha fatin hanesan, veíkulu eskoltu no patrullamentu sira hamriik prontu antes aviaun aterra. Tuir arranju ofisiál sira, Megawati nia komitiva hetan eskolta husi konvoi ho veíkulu 23, ne’ebé kompostu husi karreta VVIP, veíkulu delegasaun nian, veíkulu seguransa nian, ambulánsia ida, no motór eskoltu nian, bainhira sira la’o bá Otél Palm Springs.
Maizumenus tuku 16h22, Megawati sai husi sala VVIP ho Primeiru-Ministru Xanana Gusmão no hakat bá karreta ne’ebé hein hela. Molok konvoiu sai, nia para uitoan hodi konversa ho Xanana Gusmão no Francisco Kalbuadi Lay, ne’ebé hamriik iha veíkulu nia odamatan sorin.
Nune’e, iha tuku 16h24, karreta sira sai husi área aeroportu nian, hodi bá Otél Palm Springs. Bainhira sira liu, grupu dansadór tradisionál sira, Megawati basa-liman iha veíkulu laran hodi rekoñese benvindu ne’ebé nia simu. Estudante sira ne’ebé hale’u dalan mós ho entuziasmu lori bandeira nasaun rua nian no haksolok bainhira komitiva sira liu iha dalan áa otél ne’ebé Megawati sei hela.
Tuir itineráriu ofisiál, Megawati sei estadia iha Timor-Leste to’o loron 10 fulan-Jullu 2026, hodi partisipa iha atividade oioin ho líder timoroan sira iha ámbitu vizita boa vontade ne’ebé hakarak hametin liután relasaun amizade entre nasaun rua ne’e.
Jornalista: Arminda Fonseca
Editora: Maria Auxiliadora
