MALIANA, 08 Jullu 2026 (TATOLI) – Diretór Provedoria Direitu Umanu no Justisa (PDHJ) Delegasaun Territoriál Maliana, Elizeu Lopes, hato’o apresiasaun ba Ajénsia Notisioza Timor-Leste Tatoli, tanba nia kontribuisaun importante iha promosaun transparénsia, direitu umanu no diseminasaun informasaun ba públiku.
Iha komemorasaun aniversáriu Tatoli ba da-X iha loron 27 Jullu ne’e, Elizeu Lopes, hateten katak Tatoli sai ona “lian ba lian-la’ek sira” no parseiru di’ak ba PDHJ atu hato’o informasaun ba komunidade.
“Agradese ba prezensa Tatoli nian, katak mídia ne’e lian ba sira ne’ebé laiha. Dalaruma ami-nia estrutura ne’ebé iha ladún hetan informasaun, entaun barak liu ami rekolla informasaun ne’e husi media sira. Ho ita-boot sira-nia prezensa liuliu sai parseiru di’ak ba PHDJ para ami hatene informasaun. Kuandu sai ona, ami mós tenke badinas bá, dalaruma ami sente-an katak, ita tarde mídia lalais liu”, nia informa ba Tatoli, ohin.
Iha oportunidade ne’e, Elizeu Lopes hato’o parabéns ba Tatoli, ba nia aniversáriu no enkoraja Ajénsia Notisioza Estadu ne’e atu kontinua hametin kapasidade rekursu umanu, liuliu iha área teknolojia informasaun (IT), no espesialista iha área krime no korrupsaun.
Nia mós husu média sira atu kontinua akompaña kazu importante sira to’o prosesu tribunál remata, atu komunidade bele simu informasaun kompleta no klaru kona-ba rezultadu ikus.
“Pur ezemplu kazu korrupsaun hasoru diretór PDHJ Maliana, jornalista ida nia responsabilidade ne’e tuir to’o prosesu tribunál, to’o julga mak foin husik. Tanba dalabarak ita-boot sira públika tiha kontinuasaun ita la rona ona. Ita haree hanesan Metro TV ho TV One sira kontinua akompaña”, nia afirma.
Elizeu aumenta katak publikasaun Tatoli durante ne’e sufisiente ona, maibé komunidade mós presiza asesu ba notísia online no fó opiniaun konstrutiva hodi hametin demokrasia, transparénsia no boa governasaun iha Timor-Leste.
Antigu Diretór Servisu Munisipál Finana Autoridade Munisípiu Bobonaru ne’e hateten katak, ho polítika desentralizasaun Governu ne’ebé sei implementa iha futuru, mídia sei iha papél importante liután tanba bele liga gGovenu ho komunidade iha munisípiu sira.
Notísia relevante: Aniversáriu TATOLI: HNGV husu TATOLI fó sai informasaun ne’ebé loos no kredivel
Tuir nia, Governu tenke kontinua investe iha dezenvolvimentu setor komunikasaun sosiál, liuhusi kapasitasaun rekursu umanu, apoiu ekipamentu, internét, transporte no edifísiu propriu atu jornalista sira bele hala’o serbisu ho di’ak no profisionál tanba durante ne’e korrespondente Tatoli iha Bobonaru ne’e halo serbisu ho kondisaun mínima.
“Se la’e ita-boot sira ba ai-hun mak hakerek de’it, entaun ha’u hanoin ba oin karik ita-nia mehi Governu lokál iha ona tenke tau-matan ba mídia, tanba nia serbisu ne’e to’o fatin ne’ebé ita la konsege bá”, nia dehan.
Notísia relevante: Aniversáriu TATOLI ba da-X, Eskritór Felismino: “Kobre mós área rurál, labele hamout de’it iha kapitál”
Jornalista: Sergio da Cruz
Editora: Maria Auxiliadora
