DILI, 09 Jullu 2026 (TATOLI) – Jogadór estranjeiru husi Brazíl, Italo Soares, susesu lori ninia klube AD SLB Laulara hadau pontu tolu hosi Emmanuel FC, hafoin marka golu úniku liuhusi penalidade iha jogu kontinuasaun Liga Timorense Primeira Divizaun ne’ebé hala’o iha Estádiu Munisipál Dili, kinta kalan.
Vitória ne’e lori mós SLB hodi lidera provizoriamente tabela klasifikasaun ho pontu 16 no hakbesik an ba títulu kampiaun, maske sei hela jogu tolu tan hodi determina sira-nia destinu ikus.
Dezde apitu primeiru, SLB tula kedas presaun no lansa atake ho velosidade maka’as ba Emmanuel FC. Iha minutu 10, Italo Soares hatudu asaun individuál kmanek kuandu hadau bola husi defeza Emmanuel, Andenio Ximenes, iha liña klaran, hodi duni bola tama ba área penalidade no lansa suta ho ain-karuk, maibé guarda-redes Pablo de Jesus konsege tahan ho di’ak.
Emmanuel FC koko organiza jogu ho lalais liuhusi Feliciano da Costa no Domingos Lopes hodi hamate ritmu SLB nian, maibé médiu SLB, Jhon Frith, hatudu kualidade hodi domina kantu klaru no halo oponente sira falla beibeik. Maske SLB domina bola no lansa suta hamutuk neen ba baliza, guarda-redes Pablo de Jesus hatudu dezempeñu brilliante hodi salva hotu. Avansadu Mouzinho Barreto mós hetan oportunidade iha minutu 25, maibé ninia suta semo dook husi trave, nune’e halo primeira parte remata ho eskor mamuk 0-0.
Tama ba segunda parte, Emmanuel FC koko halo kontra-atake, maibé sira-nia esforsu nafatin de’it soke liña defeza SLB nian ne’ebé lidera husi Filomeno Júnior no Thawan de Oliveira. Guarda-redes SLB, Filonito Nogueira, mós matan-moris hodi salvaguarda ninia baliza husi ameasa hotu.
Jogu sai manas liután kuandu Emmanuel FC hatudu fuan-brani hodi halo kombinasaun di’ak liuhusi médiu Jónata Pereira, maske labele sobu defeza SLB ne’ebé metin hanesan “moru Berlin”.
Iha minutu 50, Mouzinho Barreto hetan tan oportunidade osan-mean hafoin simu pasajen husi Fábio Christian, maibé defeza Emmanuel antisipa ho di’ak hodi tebe sai “rainha de redonda” alias bola. SLB nafatin mantein ritmu atake, liliu Italo Soares ne’ebé kontinua hamoris ameasa maske ninia suta sira nafatin hetan barreira husi Pablo de Jesus.
Ikusmai, golu ne’ebé SLB hein-hein mosu duni iha minutu 65. Bainhira Italo lori bola tama ba kaixa penalidade, defeza Emmanuel, Nuncio da Silva, koko korta bola maibé soke fali Italo nia ain hodi halo nia monu, nune’e árbitru foti desizaun hodi fó penalidade ba SLB. Italo Soares ne’ebé simu responsabilidade nu’udar ezekutadór, hasai suta maka’as ho ain karuk; maske Pablo de Jesus koko baku sai, bola dulas laran hodi fura rede no muda eskor ba 1-0.
Hafoin sofre golu ne’e, Rivaldo Correia ho ninia kolega sira esforsu maka’as hodi duni eskor, liliu liuhusi suta fuik ida husi li’ur kaixa penalidade iha minutu 80, maibé bola sa’e aas de’it liu trave. Ho forsa defensiva ne’ebé metin husi SLB to’o apitu finál lian, eskor 1-0 la muda hodi fó direitu absolutu ba SLB goza pontu tolu, enkuantu Emmanuel FC tenke simu derrota ne’e ho fuan.
Jornalista: Hortêncio Sanchez
Editór: Rafael Ximenes de A. Belo
