DILI, 05 Jullu 2026 (TATOLI)—Maroko halakon uma-na’in Kanadá ho 3-0 hodi avansa ba kuartu finál iha Jornada 16 Kopa Mundiál 2026 iha Estádiu Housto, Domingu madrugada oras Timor-Leste nian.
Bainhira jogu hahú, Kanadá joga ho agresivu hahú husi inísiu, obriga Maroko atu defende hasoru atake kanadianu.
Jogu la’o iha minutu lima, Kanadá ameasa liuhusi atakante Jonathan David ne’ebé suta bola husi ângulu apertadu hetan blokeiu husi guarda-rede marrokinu Bono.
Ameasa seluk mosu iha minutu hitu nia laran, iha momentu ne’e, Tani Oluwaseyi hetan oportunidade osan-mean ida iha kaixa penalidade maibé Bono ho matenek trava Oluwaseyi nia bola suta ba baliza.
Ho presaun, Maroko sofre kontratempu iha minutu 22, ekipa afrikanu lakon sira-nia jogadór estrela, Ismael Saibari, tanba hetan aleiza entaun Saibari labele kontinua no substitui husi Soufiane Rahimi.
Oportunidade dahuluk Maroko nian mosu iha minutu 28, bainhira Rahimi ne’ebé mak tama hanesan substitute halo ameasa kedas ba baliza Kanadá nian.
Rahimi halo suta ida husi área penalidade nia li’ur, maibé husi guarda-rede kanadianu Maxime Crepeau.
Jogu ne’e la’o maka’as liután, ho presaun ki’ik balun entre ekipa rua ne’e besik atu primeira parte ramata, nune’e ba intervalu ne’e ho rezultadu 0-0.
Maroko ne’ebé hetan presaun iha primeira parte tomak, konsege hetan vantajen iha inísiu segunda parte, bainhira Azzedine Ounahi marka golu ne’ebé fó vantajen ba Maroko iha minutu 50 hodi muda rezultadu ba 1-0.
Liutiha minutu lima, Maroko hetan oportunidade hodi aumenta sira-nia vantajen, baonhira Rahimi ne’ebé hakat ba área penalidade, tenta atu pasa bola maibé laiha ema ida- mak halai hamaluk ho nia entaun oportunidade di’ak ne’e lakon leet de’it.
Kanadá labele ona joga ho livre hanesan iha primeira parte tanba Canucks hetan obrigasaun atu luta maka’as tanba Maroko joga ho agresivu liu iha duelu hotu-hotu iha kampu.
Kanadá iha oportunidade atu halo empata ho suta livre iha minutu 77, iha biban jogadór Jonathan David hakat ba oin hodi foti suta livre maibé bola liu trave Maroko nian.
Jogadór parre direita, Tajon Buchanan tenta suta ida ho distánsia dook hafoin liu minutu rua maibé Bono dala ida tan iha pozisaun loos hodi sala bola.
Iha minutu 82, Maroko konsege aumenta eskoru ba 2-0 liuhusi jogadór Ounahi hodi marka golu, tanba aproveita pasajen badak husi Brahim Diaz ne’ebé penetra iha kaixa penalidade kanadianu nian.
Minutu tolu liutiha, Maroko besik atu aumenta sira-nia vantajen ba 3-0 maibé jogadór Rahimi nia kabesa bola ne’ebé lori bola kona de’it iha trave balzia nian.
Maroko la satisfeitu ho sira-nia vantajen 2-0 mak jogadór Brahim Diaz nia pasajen badak ne’ebé matenek ba Rahimi halo buat ne’ebé di’ak-liu, hodi hasai suta baixu konsege tama liu ba rede laran iha minutu 90+8 hodi muda rezultadu 3-0.
Ho rezultadu ida-ne’e, Maroko sai hanesan ekipa dahuluk ne’ebé mak hakat ba kuartu-finál Kopa Mundiál 2026 nian.
Kanadá:
Maxime Crepeau; Richie Laryea, Derek Cornelius, Moise Bombito, Alistair Johnston; Alphonso Davies, Stephen Eustaquio, Nathan Lintasa, Tajon Buchanan; Cyle Larin, Jonathan David.
Maroko:
Yassine Bono; Achraf Hakimi, Issa Diop, Chadi Riad, Noussair Mazraoui; Ayyoub Bouaddi, Neil El Aynaoui; Brahim Diaz, Azzedine Ounahi, Bilal El Khannouss, Ismael Saibari.
Jornalista : Hortêncio Sanchez
Editór : Cancio Ximenes
