DILI, 12 Jullu 2026 (TATOLI)- Tribunál Judisiál Primeira Instánsia Dili (TJPID) halo interrogatóriu judisiál dahuluk ba arguidu na’in-29 ne’ebé deskonfia envolve krime jogu ilísitu online scaming call center iha aldeia Lemokari, suku Manleuna, ne’ebé autoridade seguransa detein iha kuarta-feira (08/07) ne’e.
Iha primeiru interrogatóriu ne’e, Ministériu Públiku ne’ebé reprezenta husi Prokuradór Domingos Goveia Leite promove krime burla informatika, asosiasaun kriminoza, no jogu ilísitu.
Nune’e, iha interrogatóriu ne’e Ministériu Públiku solisita ba Tribunál aplika kauzaun $5.000, nune’e kada arguidu iha obrigasaun selu osan ho montante ne’e. Maibé, parte defeza husi arguidu sira, Advogdu Privadu Arlindo Sanches husi Tribunál husi atu aplika medida koasaun Termu Identidade Rezidénsia (TIR), Aprezentasaun Periódika (AP), nune’e arguidu sira iha obrigasaun selu osan kauzaun (jaminan) ba Estadu ba hahalok ne’ebé sira halo.
Hafoin Tribunál rona tiha parte hotu, Juiz José Gonçalves hasai despaxu ba arguidu na’in-28 mak hetan medida koasaun haat mak hanesan Termu Identidade Rezidénsia, Aprezentasaun Periódika, nune’e arguidu sira aprezenta-an fulan ida dala-rua iha Eskuadra Polísia ne’ebé besik.
No Tribunál aplika mós Medida Koasaun Kauzaun no Medida Proibisaun Auzénsia hodi Tribunál deside sita arguidu sira-nia pasaporte.
Nune’e, arguidu na’in-28 ne’e, iha obrigasaun selu kauzaun ba ema ida ho osan valór $2.500.
Tribunál iha despaxu ne’e fó prazu semana ida atu arguidu sira tenke selu osan kauzaun ho valór kuantia $2.500, hahú sura husi despaixu Tribunál nian to’o loron 20 Jullu 2026.
Kuandu arguidu sira la kumpre despaxu Tribunál nian maka sei altera medida koasaun sira ba fali Medida Koasaun Prizaun Preventiva.
Enkuantu, arguidu ida seluk ho inisiál CCC, Tribunál aplika de’it Medida TIR no kauzaun $2.500, nune’e arguidu iha obrigasaun selu osan no livre husi aprezentasaun periódika.
Tribunál mós liuhusi despaxu entrega arguidu CCC nian Pasaporte no osan ho montante $6.500 ne’ebé autoridade seguransa halo apreensaun iha Metiaut foin lalais ne’e.
Tanba durante iha interogatoriu dahuluk ne’e arguidu CCC aprezenta faktu katak momentu ne’e nia atu bá fali nia nasaun orijen Xina mak nia bá vizita ikus nia maluk sira iha Metiaut no autoridade seguransa halo buska hodi halo apreensaun ba nia osan no billete.
Nune’e, arguidu aprezenta ba Tribunál no konsidera faktu sira ne’e.
Interrogatóriu judisiál dahuluk ne’e prezide husi Juiz José Goncalves, MP reprezenta husi Prokuradór Domingos Goveia Leite no arguidu sira hetan asistensia husi Advogdu Privadu Arlindo Sanches no Napoleão de Jesus.
Notísia relevante: Kazu scam call center, MP alega arguidu D ho prizaun preventiva
Jornalista: Natalino Costa
Editora: Maria Auxiliadora
