DILI, 16 Jullu 2026 (TATOLI)—Autoridade Inspesaun Fiskalizasaun Atividade Ekonómika no Sanitária Alimentár, Institu Publiku (AIFAESA, I.P, sigla portugés) ezekuta ona Orsamentu Jerál Estadu (OJE) 2026 hahú husi fulan-Janeiru to’o Jullu ne’e 50%
“Tuir planeamentu, trimestre ida-idak tenke ezekuta besik 25%. Hanesan iha trimestre dahuluk ezekuta ona 25%, trimestre daruak 50%, trimestre datolu 75%, no trimestre dahaat tenke kompleta 100%,” Inspetora Jerál Autoridade Inspesaun Fiskalizasaun Atividade Ekonómika no Sanitária Alimentár (AIFAESA, sigla portugés), Odete Maria Viegas, informa Inspetora Jerál AIFAESA relata ba jornalista sira iha nia kna’ar fatin Matadoru, ohin.
Ezekusaun sira-ne’e foka liu ba servisu prestasaun bens servisu, pagamentu saláriu ba funsionáriu sira, servisu programátiku nian hanesan inspesaun no mós infraestrutura ne’ebé mak halo reabilitasaun, servisu limpeza, fornesimentu aihan mak konsege ezekuta to’o 50%.
“Maske dalaruma iha dezafiu ruma maibé hotu-hotu tenke kontinua servisu ho responsabilidade no kompromisu atu atinje objetivu sira-ne’ebé estabelese ona,” nia dehan.
Enkuantu Orsamentu Jerál Estadu (OJE) 2026 ne’ebé Governu aloka ba AIFAESA hamutuk $2.025,015 iha tinan 2026, ne’ebé kompostu husi saláriu no vensimentu $1.137,768, bens no servisu $787.247 no kapitál menór $100.000.
Jornalista : Alexandra da Costa
Editór : Cancio Ximenes
