DILI, 17 Jullu 2026 (TATOLI)—Primeiru-Ministru, Kay Rala Xanana Gusmão, enkoraja Agência Notisioza Timor-Leste, Institutu Públiku (TATOLI, I.P) atu kontinua kumpre obrigasaun hodi fó sai informasaun loloos ba povu.
Xefe Governu ne’e hato’o parabéns ba aniversáriu ezisténsia TATOLI ba da-10 (27 Jullu 2016 – 27 Jullu 2026) ne’ebé tuir planu sei selebra iha 27 Jullu 2026 ne’e.
Notísia Relevante: “Sai jornalista di’ak tenke investiga uluk no baze iha mak husu, la’ós husu de’it”
“Tenke ka’er prinsípiu hanesan ne’e nafatin, atu kumpre nafatin obrigasaun ne’ebé hetan duni hodi haklaken informasaun loloos ba povu tomak. Parabens ba imi,” Primeiru-Ministru, Kay Rala Xanana Gusmão, hateten ba Agência Tatoli iha Ministériu Finansa, ohin.
Antes ne’e, iha loron 14 fulan-Maiu 2026, bainhira Primeiru- Ministru, Kay Rala Xanana Gusmão hala’o enkontru kortézia ho Prezidente Repúblika, José Ramos-Horta iha Palásiu Prezidensiál Aitarak laran no nia enkoraja jornalista sira katak atu sai jornalista di’ak tenke investiga uluk no iha ona baze mak hafoin husu pergunta ba fonte ida kona-ba asuntu importante ne’ebé liga ho servisu Estadu no Governu nian.
“Ha’u mós uluk jornalista, atu sai jornalista di’ak kuandu rona buat ruma ne’e tenke investiga uluk no baze iha mak husu, la’ós husu de’it, ne’e la’ós jornalizmu, ne’e perguntizmu, husuizmu. Kuandu rona buat ruma tenke investiga,” PM Xanana hateten.
Ajénsia TATOLI, I.P nu’udár ajénsia ofisiál Estadu Timor-Leste nian. Ezisténsia TATOLI, I.P. maihusi inisiativa Sekretaria Estadu Komunikasaun Sosiál (SEKOMS), iha 2012-2017 nu’udár transformasaun husi ETNA (East Timor News Agency), ne’ebé nakfilak ba ANTIL (Ajénsia Notisioza Timor-Leste).
Ajénsia Estadu ne’e hetan aprovasaun iha Konsellu-Ministru no públika iha Jornál Repúblika iha loron 14 Marsu 2016, nu’udár embriaun ho naran ANTIL ne’ebé lansa iha 27 Jullu 2016. Fulan-Marsu 2017, Konsellu- Ministru aprova ANTIL sai TATOLI, nu’udár ajénsia ofisiál Estadu Timor-Leste nian no publika iha Jornál Repúblika, ho estatutu nu’udár Institutu Públiku (I.P.).
Objetivu estabelese ajénsia TATOLI, I.P. sai fonte informasaun ofisiál Estadu Timor-Leste ne’ebé iha kapasidade elabora produtu informasaun no notísia ne’ebé nesesita husi públiku utilizadór informasaun iha eskala nasionál, rejionál no internasionál bazeia ba natureza no karakterístika; rapidéz no rigór, maibé labele ignora nia rigorozidade hanesan akurásia, independente, inzenta, klareza no nafatin iha integridade no mós kredibilidade.
Notísia Relevante: Xanana: “Naran jornalista nian mak XANANA, naran funu nian mak KAY RALA”
Jornalista : Alexandra da Costa
Editor : Cancio Ximenes
