DILI, 14 Maiu 2026 (TATOLI)—Primeiru-Ministru, Kay Rala Xanana Gusmão, enkoraja jornalista sira katak atu sai jornalista di’ak tenke investiga uluk no iha ona baze mak hafoin husu pergunta ba fonte ida kona-ba asuntu importante ne’ebé liga ho servisu Estadu no Governu nian.
Notísia Relevante: Xanana: “Naran jornalista nian mak XANANA, naran funu nian mak KAY RALA”
“Ha’u mós uluk jornalista, atu sai jornalista di’ak kuandu rona buat ruma ne’e tenke investiga uluk no baze iha mak husu, la’ós husu de’it, ne’e la’ós jornalizmu, ne’e perguntizmu, husuizmu. Kuandu rona buat ruma tenke investiga,” PM Xanana hateten ba jornalista sira hafoin ramata enkontru ho Xefe Estadu, José Ramos-Horta, iha Palásiu Prezidensiál Nicolau Lobato, Bairru Pite.
Xanana hato’o hanoin ne’e bainhira jornalista balun husu pergunta kona-ba Bankada CNRT iha Parlamentu Nasionál preokupa iha ministériu balun ne’e ninia asesór kuaze to’o ema 60.
“Wao! Fó took naran sira-ne’e mai. Ba husu took iha Komisaun Funsaun Públiku (KFP), iha lista asesór sira-ne’e ami selu ka la selu, maibé barak protesta tanba osan ami ko’a hotu,” Xanana dehan.
Lider no antigun jornalista ne’e fó hanoin tan, bainhira rona isu ruma ne’ebé liga ho kazu ruma presiza investiga no kria ekipa atu buka tuir to’o hetan, la’ós husu de’it pergunta maibé laiha baze ruma.
“Tenke investiga ba asuntu sira hanesan ne’e. Se la’ós ita-boot smak ba haruka ema seluk ba investiga. Ita investiga husu Ministériu ida-ne’e uluk iha asesór rua maibé agora aumenta tiha, tanba hasai balun husu Ministériu seluk ne’ebé 10-resin ne’e mak rua halai tan mai Ministériu ida-ne’e ho dadus kompletu mak ita husu, la’ós husu hanesan ne’e,” Xanana dehan.
Jornalista : Hortêncio Sanchez
Editór : Cancio Ximenes
