Ministru Ekonomia no Finansa São Tomé e Príncipe konsidera g7+ parseiru importante ba demokrasia

SÃO TOMÉ E PRÍNCIPE, 17 Jullu 2026 (TATOLI) – Ministru Ekonomia no Finansas São Tomé no Príncipe, Gareth Guadalupe, destaka papel g7+ nu’udar parseiru importante ba nasaun ne’e, no konsidera prezensa Missaun Observasaun Eleitorál (MOE) g7+ hanesan prova ida husi “boa vontade no solidariedade” husi organizasaun ne’e.

Deklarasaun ne’e hato’o durante enkontru kortezia ho delegasaun MOE g7+ ne’ebé atualmente iha São Tomé no Príncipe atu observa eleisaun prezidensiál ne’ebé sei realiza iha loron 19 Jullu.

“g7+ mak parseiru ida ne’ebé amigável no di’ak ba São Tomé no Príncipe. Faktus katak imi deside mai São Tomé mak prova husi boa vontade g7+ nian”, dehan Gareth Guadalupe.

Governante ne’e hatete katak São Tomé e Príncipe atulamente enfrenta dezafiu ekonomiku boot, tanba aumentu presu iha merkadu internasionál no dependénsia aas ba produtu importandu, maibé Gareth Guadalupe garante katak, maske iha situasaun difísil, Governu konsege asegura finansiamentu ba eleisaun prezidensiál liuhusi reseita doméstika no fundu ne’ebé apoiu husi Governu Japaun.

“Ami iha situasaun ne’ebé difísil tebes. Aumentu presu lori rekursu sira ne’ebé lolos ne’e uza ba seláriu, ai-moruk no servisu importante sira. Maibé ami konsege finansiá eleisaun, tanba ida ne’e parte importante husi demokrasia no demokrasia la’ós buat ida ne’ebé barata, maibé eleisaun mak parte husi demokrasia”, dehan Gareth Guadalupe.

Iha fatin hanesan Xefe MOE g7+, Floyd Oxley Sayor, agradese disponibilidade ministru nian no rekoñese papél importante husi Ministériu Ekonomia no Finansas iha preparasaun finanseira ba prosesu eleitorál.

Komisáriu ne’e hatete katak durante iha São Tomé e Príncipe, MOE g7+ halo ona enkontru ho Prezidente Repúblika, Carlos Vila Nova, Primeiru-Ministru, Américo d’Oliveira dos Ramos, sosiedade sivil, Polísia Nasionál no partidu polítiku sira, ho objetivu buka hatene kona-ba ambiente polítiku antes votasaun.

“Objetivu ami-nian mak atu apoia prosesu demokrátiku, atu komunidade internasionál haree katak prosesu ne’e kredível, pasífiku no justu”, afirma Floyd Oxley Sayor.

Nune’e mós Diretór Operasionál g7+, Felix Piedade, aproveita oportunidade atu agradese Governu São Tomé no Príncipe ba apoiu ne’ebé fó ba missáun, liu-liu servisu koordenasaun husi pontu fokál g7+ iha nasaun ne’e atu garante preparasaun enkontru no apoiu lojístiku.

Felix Piedade informa óos kona-ba rezultadu husi Enkontru Dalimak g7+ ne’ebé hala’o iha Abril 2025 iha Lisboa, inklui proposta kona-ba kontribuisaun anuál husi Estadu-Membru sira hodi garante sustentabilidade organizasaun nian, nomós preparasaun ba realizasaun reunaiun g7+ nian ne’ebé sei realiza iha Nova Iorque, Estadus Unidus Amérika, iha margem Enkontru Asambleia Jerál Nasaun Unidas iha fulan sira tuir mai.

Notísia relevante: MOE g7+ hasoru kandidatu Nito d’Abreu atu avalia preparasaun eleisaun prezidensiál

Jornalista: Afonso do Rosário

Editora: Isaura Lemos de Deus