São Tomé e Príncipe, 17 Jullu 2026 (TATOLI) – Delegasaun Missaun Observasaun Eleitorál (MOE) g7+ hasoru malu ho kandidatu eleisaun prezidensiál São Tomé e Príncipe Nito d’Abreu atu rona nia avaliasaun kona-ba prosesu eleitorál no situasaun kampaña antes loron votasaun ne’ebé sei realiza iha Domingu ne’e.
Delegasaun MOE g7+ hasoru malu ho kandidatu eleisaun prezidensiál São Tomé e Príncipe Nito d’Abreu iha sidade São Tomé. Foto: Afonso do Rosário
Hafoin enkontru ne’e, Xefe Missaun MOE g7+, Floyd Oxley Sayor, hatete katak ekipa observadór husu ba kandidatu kona-ba iha ka lae problema ruma durante prosesu eleitorál, atu bele hetan komprensaun klaru kona-ba situasaun no fó kontribuisaun ba prosesu eleitorál ne’ebé livre, transparente no kredível.
“Ami sei kontinua hamutuk ho parte hotu-hotu iha prosesu ne’e. Objetivu ami nian mak atu haree katak prosesu eleitorál la’o livre no transparente”, dehan Floyd Oxley Sayor.
Nito d’Abreu hato’o satisfasaun ho vizita MOE g7+, no rekorda katak nia uluk mós hola parte iha organizasaun ne’e hanesan observadór ida iha prosesu eleitorál ne’ebé reliaza iha Guiné-Bissau iha tinan hirak liu ba.
Nia esplika katak prepara nia-kandidatura durante fulan lima resin, no hahú husi fulan Maiu adopta ona estratéjia kampaña ne’ebé bazeia ba “aprosimasaun direta ho komunidade”.
Kandidatu presidente ne’e haktuir katak, hafoin nia-kampaña ofisiál hahú iha loron 4 Jullu, nia no ekipa intensifika kontaktu ho povu atu rona sira-nia hanoin no nesesidade.
“Prezidente Repúblika mak garante Konstituisaun no funsionamentu di’ak instituisaun sira. Maski la iha podér ezekutivu, Prezidente tenke hatene realidade nasaun atu bele hala’o nia knaar ho di’ak”, nia informa ba delegasaun sira durante enkontru ne’e.
Kandidatu ne’e mós afirma katak nia mensajen prinsipál ba kampaña mak “promove dame, progresu no unidade nasionál”, atu povu São Tomé e Príncipe labele iha tan divizaun polítika sira ne’ebé akontese iha tinan hirak liubá no harii kultura diálogu no inkluzaun.
MOE g7+, ne’ebé lidera husi Floyd Oxley Sayor, sei kontinua hala’o enkontru ho kandidatu no instituisaun relevante sira durante observasaun ba eleisaun prezidensiál São Tomé no Príncipe ne’ebé sei realiza iha loron 19 Jullu.
Notícia relevante: MOE g7+ hasoru kandidatu Nito d’Abreu atu avalia preparasaun eleisaun prezidensiál
Jornalista: Afonso do Rosário
Editora: Isaura Lemos de Deus
