Membru na’in-500 Konsellu Polisiamentu Komunitária simu pose
DILI, 21 Outubru 2026 (TATOLI)—Membru na’in-500 Konsellu Polisiamentu Komunitária (KPK), Kuarta ne’e, simu pose hodi bele hamutuk ho Polísia Nasionál Timor-Leste (PNTL) prevene krime iha Dili.
Membru sira ne’e mai husi Suku 27 iha Postu Administrativu tolu hanesan Vera Krús, Na’in-Feto no Dom Aleixo iha Munisípiu Dili.
Segunda Komandante-Jerál PNTL, Komisária Asistente Polísia Natercia Eufrásia Soares Martins, hateten, maluk sira ne’e fó-an hodi kontribui voluntáriu ba KPK atu serbisu hamutuk ho Polísia atu buka kauza husi problema sira nune’e bele fó solusaun.
“Ha’u hatene katak solusaun ne’e ita-boot sira labele rezolve, tanba ne’e ita sira autoridade ne’e nia alvu mak atu haree ba komunidade, se alvu mak komunidade ita rezolve ona, maibé tanba sá mak problema sempre mosu iha komunidade nia le’et,” Komisária Asistente Polísia Natercia Martins hato’o iha nia intervensaun bainhira fó pose ba membru KPK sira iha Komandu PNTL Munisípiu Dili.
Notísia relevante : KPK 112 sei ajuda PNTL garante estabilidade iha Maliana
Nune’e, Natércia Martins konsidera Konsellu ne’e hanesan mekanizmu estratéjiku atu hametin konfiansa no parseria entre PNTL ho komunidade, liuhusi Polisiamentu Komunitária ne’ebé bele ajuda identifika problema, prevene konflitu no buka solusaun pasífiku ba ameasa seguransa públika.
“Ohin ita-boot sira simu responsabilidade importante ida-ne’e, ne’ebé komunidade entrega ho esperansa boot, fiar boot no konfiansa boot,” nia akresenta.
Komisária Asistente Polísia Natercia hato’o mensajen prinsipál lima atu sai mata dalan ba membru KPK ninia misaun: ida serbí ho responsabilidade no integridade, rua sai ezemplu di’ak iha komunidade nia le’et, tolu hametin intervensaun no komunikasaun efetivu ho PNTL, haat promove dame no unidade sosiál no lima proteje grupu vulnerável sira.
Hamutuk kontribui ba pás
Iha fatin hanesan, Komandante Komandu PNTL Munisípiu Dili, Komisáriu Asistente Polísia Orlando Gomes, enkoraja membru sira hodi hamutuk kontribui ba pás no estabilidade.
Nia konsidera, objetivu tomada pose ne’e atu hametin operasaun no hametin komunikasaun entre parseiru PNTL ho komunidade KPK sira ne’ebé mak reprezenta komunidade.
“Atu halo ita-nia relasaun ida-ne’ebé metin atubele hamutuk prevene krime no promove dame atu kria estabilidade iha munisípiu Dili,” nia subliña.
Tanba Munisípiu Dili nia sentru administrasaun ekonómiku polítiku, sosiál no kulturál konsentra hotu iha ne’e. Tanba ne’e, Polísia ho KPK tenke serbisu hamutuk atubele prevene konflitu iha kapitál Dili.
“Membru KPK sira ne’ebé mai husi suku 27, Postu Administrativu tolu iha munisípiu Dili sei sai parseiru importante ba Polísia Nasionál Timor-Leste, liuhusi Komandu Munisípiu Dili atu identifika no buka solusaun ba problema sira ne’ebé bele hamosu konflitu, ameasa seguransa no perturba estabilidade iha komunidade,” nia katak.
Komisáriu Asistente Polísia Orlando Gomes hateten, Konsellu Polisiamentu Komunitáriu iha papél importante atu hametin komunikasaun entre autoridade Polísia, líder komunitária no populasaun. Ho kooperasaun ne’e, komunidade bele partisipa ativu iha esforsu prevensaun krime, rezolusaun disputa no dezenvolvimentu ambiente ne’ebé seguru no hakmatek.
Kontrola konflitu iha bairru
Nune’e mós, Reprezentante Ministru Interiór, Domingos de Carvalho Araújo ‘Dokar’, hateten, KPK nia serbisu atu kontrola konflitu sira ne’ebé mosu iha bairru atu oinsá tun buka solusaun ka diálogu.
Nia dehan, serbisu KPK fó apoiu ba Polísia atu halo prevensaun no rezolve konflitu sira ne’ebé mosu iha bairru-bairru, ho objetivu atu mantein dame, seguransa no estabilidade iha komunidade.
Servisu kolaborasaun entre KPK, Polísia no komunidade konsidera importante tebes atu prevene konflitu antes sai grave no hamenus posibilidade atu akontese violénsia entre membru komunidade sira.
“Prevensaun konflitu presiza hahú husi identifikasaun ba problema sira ne’ebé bele hamosu disputa, hanesan dezentendimentu entre joven sira, problema entre família no diferensa hanoin entre grupu sira iha komunidade,” nia tenik.
Liuhusi kooperasaun entre instituisaun relevante sira, Polísia bele hala’o monitorizasaun no intervensaun sedu, enkuantu KPK bele fó apoiu tuir nia knaar no kompeténsia atu ajuda buka dalan rezolve problema sira ne’ebé mosu.
Nune’e mós, reprezentante Prezidente Autoridade Munisípiu Dili, Jacinto Freitas, husu ba Konsellu Polisiamentu Komunitária ne’ebé simu ona pose halo serbisu tenke ho responsabilidade no tenke respeita sidadaun sira.
“Loos duni KPK nia papél no serbisu importante la halimar atu serbisu hamutuk ho ita-nia Polísia, OPS iha suku sira (Xefe Suku) no Konsellu Suku, Autoridade Postu Administrativu também Autoridade Munisípiu Dili ne’ebé mak iha kapitál Dili,” nia hatutan.
Jornalista : Natalino Costa
Editora : Julia Chatarina
