Estoke Tubu Vacutainer menus, Laboratóriu Nasionál rekolla 400 husi ospitál referál sira
DILI, 10 Novembru 2026 (TATOLI)—Diretór Jerál Laboratóriu Nasionál Saúde, Mario Coelho hateten, tubu raan nian ka tubu vacutainer daudaun ne’e estoke menus maibe konsege halo kounikasaun internál ho ospitál referál sira no rekolla ona 400, hodi apoiu ba iha servisu Laboratóriu Nasionál nian.
“Loos duni, ita-nia tubu raan nian maka tubu teste vidru ka plástiku ida-ne’ebé estéril ho taka borraxa ne’ebé uza hodi halibur, estabiliza, no haketak amostra raan nian ba teste laboratóriu. ne’ebé mak halo teste kímika raan, konsege stock out. Maibé ita iha komunikasaun internál iha ita-nia rai laran, hospitál referénsia sira nomós iha sentru saúde sira hotu, ita rekolla ona husi Munisipiu Ermera 200 no Ospitál Referénsia Maubisse 200 maizumenus, 400 nune’e. No ita-nia pedidu ita sempre halo ba INFPM, no prosesu kompra mós la’o hela, ne’ebé agora daudaun ita stock iha hela,” nia dehan.
Nia esplika, tubu raan nian haree ba la sufisiente ba kandidatu ba vaga ospitál nasionál nian ne’ebé ho totál 2.400.
“Haree bazeia ba númeru kandidatu ba vaga nian, ita sukat lato’o bainhira 400 de’it. Ita sei koko nafatin para oinsá mak bele rezolve imediatamente iha tempu badak. Ne’ebé, ita-nia liña komunikasaun ho ospitál sira, sentru saúde sira iha territoriu Timor laran ita halo. Balun ne’ebé mak barak liu no ladún uza, sira-ne’e tenke lori mai atu oinsá mak ita bele uza iha Laboratóriu Nasionál,” nia hateten.
Komunikasaun la’o hela no balun hanesan ohin dehan mai daudauk ona, no pedidu ne’ebé mak haruka ba INFPM prosesu kompra mós agora iha prosesu nia laran. Espera katak antes de ida ne’e liu loron hira nia laran, bele hetan ona rezultadu husi kompra bazeia ba pedidu ne’ebé mak husi Laboratóriu Nasionál halo ba.
Nia afirma, LABNAS konfirma ona katak INFPM kompra nia laran no iha prosesu transporta mai, lahatene, depois LABNAS konfirma fali tanba ida-ne’e prosesu komunikasaun loro-loron halo hela.
“Bainhira mak tubun ne’e to’o tanba ita hatene katak tempu badak kandidatu sira ne’e tenke hetan rezultadu para sira lori ida-ne’e bá fali ba área entrevista nian. Loos, ema hotu hakarak dehan bainhira mak buat ne’e tenke to’o tanba kona-ba situasaun agora ne’e, ita hein ida-ne’e tanba ita halo komunikasaun nafatin. Nia to’o bainhira ne’e ita hein de’it tanba laboratóriu ne’e user. Ita mós la prodús buat ida. Kompra ne’e INFPM nia kompeténsia atu kompra buat sira-ne’e, maibé ita hein de’it sira-nia prosesu sira. Hanesan ita ne’ebé mak user ne’e, ita só bainhira stock out ita halo pedidu ba INFPM de’it.
Nia relata, tubu ne’e LABNAS rezerva ba pasiente mós iha. Ohin dehan 400 ne’e la’ós hotu-hotu tenke ba pasiente medical check-up sira-ne’e. Rezerv pasiente tanba planu ne’e la tau ba iha medical check-up nian.
Maibé iha tinan klaran prosesu hanesan ne’e, tuir orden de’it para oinsá mak rezerva ba pasiente mós iha, tanba pasiente importante loos oinsá deteta sedu sira-nia moras no bele halo tratamentu sedu no bele rekupera sira-nia saúde.
Iha sorin seluk, Ministra Saúde Eliá Amaral, hatete estoke reajente iha Laboratóriu Nasionál Saude iha, tanba reazente ne’e rasik Ministériu Saúde sempre tau kuaze millaun ida.
“Ita-boot hateten katak reajente ho númeru hirak mak durante ne’e atende ba populasaun tomak ba iha reajente ne’e rasik mais millaun ida ba iha atendimentu ba iha laboratóriu. Sasán sira-ne’ebé mak profisionál saúde sira iha Hospital Nasionál Guido Valadares halo atendimentu,” nia dehan.
Jornalista : Felicidade Ximenes
Editór : Cancio Ximenes
