COVALIMA, 30 juñu 2021 (TATOLI)-Atu garante bee-moos ba komunidade, Servisu Bee Timor-Leste, Empreza Públiku (BTL,E.P) hahú mellora distribuisaun bee-moos besik ba komunidade-sira.
BTL,E.P Munisípiu Covalima daudaun ne’e halo hela akompañamentu ba projetu kanalizasaun bee-moos iha área Seran Kotek atu kobre ba Asumaten Nuu Laran, Lookeu, Talioan ho Busa Kukun no ba to’o iha área Leogore, kampung Datotolu, Kunain, ho Orun.
Projetu kanalizasaun bee-moos ne’e ho montante orsamentu $226.114,62 ne’ebé ezekuta hosi kompañia lokál Maun Alin Unipessoal Lda,
“Ami halo teste ba kanu bee-moos hosi kompañia Maun Alin LDA tanba simu orientasaun hosi Nasionál hodi haree sistema kanalizasaun bee-moos no hodi hatene kualidade instalasaun bee-moos hosi kompañia Maun Alin Unipessoal Lda,” Diretór BTL,E.P Munisípiu Covalima, Castro Dosi Ramos, informa ba Agência Tatoli iha Covalima, kuarta ne’e.
Nia hateten, molok kompañia atu entrega projetu ne’e, BTL,E.P tenke halo test no akompaña hodi halo observasaun iha terrenu atu kompañia ezekuta obra ne’e tuir duni padraun ne’ebé BTL, E.P hanesan nain ba projetu estabelese iha BoQ (Bill of Quantity).
Jornalista : Celestina Teles
Editór : Francisco Simões
