Kovalima, 11 Juñu 2026 (TATOLI)-Diretór SEFOPE munisípiu Kovalima, Stefanus Segundo Manek, hateten, daudaun ne’e kandidatu traballadór Austrália hamutuk ema-na’in 430 iha Kovalima hahú atualiza dadus pesoál ba Diresaun SEFOPE munisipál nian.
Nia hateten, daudaun ne’e, funsionáriu husi SEFOPE Kovalima hala’o atendementu ba kandidatu traballadór Austrália ne’ebé mak rejista iha faze da-ruak tanba naran tama ona iha sistema no hetan ona númeru referénsia hodi kompleta sira-ninia dokumentu sira antes hetan kontratu hodi bá serbisu iha rai-liúr.
Dirijente SEFOPE Kovalima ne’e informa dokumentu valídu ne’ebé mak kandidatu traballadór sira presiza atu atualiza mak hanesan komportamentu di’ak, billete identidade (BI) kartaun eleitorál, sertidaun RDTL, pasaporte no sertifikadu sira.
Dokumentu atulizadu hirak ne’e, nia dehan husi SEFOPE munisipál sei submete ba nasionál hodi rejista no atualiza iha sistema online.
“Bainhira mak atu bá servisu depende husi empreza sira iha Australia tanba SEFOPE fasilita de’it sidadaun-sira oinsá atu bá servisu iha rai-liúr hanesan Austrália,” nia relata ba jornalista sira iha Kovalima ohin.
Iha sorin seluk kandidatu Traballadór Austrália, Mozinho Sarmento reforsa katak,nia prezensa iha SEFOPE atu submete dokumentu bazeia ba avizu ne’ebé fó sai husi SEFOPE
“Ami foin mak dahuluk submete ami-nia dokumentu SEFOPE foin públika sai ami-nia naran no halo ami atu kompleta ami-nia dokumentu bazeia ba avizu ne’ebe fó sai husi SEFOPE, tanba ami hetan ona númeru referénsia ,” nia hateten.
Jornalista: Celestina Teles
Editor: Florencio Miranda Ximenes
