DILI, 09 agostu 2021 (TATOLI)-Diretór Ezekutivu Forum Organizasaun Naun Governamentál Timor-Leste (FONGTIL), Daniel Santos do Carmo, hateten abitante sira kontinua halo viajen ilegál iha fronteira terrestre-sira tanba abitante sira menus konsiénsia.
Notísia Relevante : PNTL kaptura sidadaun 11 tenta hakat ilegál ba Atambua
“Kona-ba kazu pasajen ilegál ne’ebé kontinua mosu hanesan foin lalais akontese iha sábadu (07/08) tuku 03:00 madrugada iha área Suku Saburai, Postu Administrativu Maliana, Munisípiu Bobonaro, ne’e Estadu Timor-Leste bele tau forsa hotu-hotu iha fronteira mós abitante sira mak laiha konsiénsia, entaun kazu pasajen ilegál ne’e kontinua mosu,” Daniel Santos do Carmo haktuir ba jornalista-sira iha salaun FONGTIL, Caicoli, Dili, segunda ne’e.
Nia konsidera kazu pasajen ilegál kontinua mosu la’ós tanba seguransa másimu ka lae, maibé depende ba konsiénsia sidadaun nian.
Atu evita ema labele halo pasajen ilegál, tuir nia, Governu presiza reforsa kontrolu fronteira, no membru Polísia Nasional Timor-Leste (PNTL) ne’ebé servisu iha fronteira ne’e tenke leál ba Estadu. Katak la fasilita abitante sira atu komete irregularidade tama ema-nia soberania.
Jornalista : Arminda Fonseca
Editór : Francisco Simões
