DILI, 18 outubru 2021 (TATOLI)—Diresaun Nasionál Infraestrutura Edukativa Ministériu Edukasaun Juventude no Desportu (DNIE-MEJD) planeia tinan ne’e hadi’a Eskola Ensinu Báziku Sentrál (EBC) Bidau Akadiru-hun nia sala hitu no toilet ida.
Adjuntu Diretór Eskola EBC Bidau Akadiru-hun, Cesaltino Francisco Assis, hateten, obra ne’e sei toma konta hosi grupu komunitária, ne’ebé forma hosi DNIE-MEJD.
“Bill of Quantity (BOQ) sai ona, ne’ebé orsamentu kuaze $96.000-resin, ho durasaun tempu projetu fulan-neen, inklui projetu hadi’a eskola ne’e ho kustu $93-resin,” Adjuntu Diretór informa ba Agência TATOLI, segunda ne’e, iha ninia knaar fatin, Eskola EBC Bidau Akadiru-hun, segunda ne’e.
Notísia relevante: MEJD planea reabilita sala aula 680 iha tinan oin
Nia esplika, sala hitu kompostu hosi neen ba estudante no ida ba mestre sira, ne’ebé planu atu hadi’a eskola ne’e sei hahú iha novembru tinan ne’e no sei finaliza iha maiu 2022.
Biban ne’e, Reprezentante Eskola ne’e husu grupu komunitária atu kaer obra ho responsabilidade.
“Ha’u husu grupu komunitáriu ne’ebé hetan konfiansa hosi ministériu kaer projetu ne’e, tenke garante kualidade, labele buka lukru, no halo ho responsablidade atu fulan-neen nia laran, sala hirak ne’e bele ramata ho susesu,” nia akresenta.
Jornalista : Tomé Amado
Editora : Julia Chatarina
