MALIANA, 02 Juñu 2026 (TATOLI) – Polísia Nasionál Timor-Leste (PNTL) iha Munisípiu Bobonaru enfrenta difikuldade iha prosesu investigasaun ba asidente tráfegu ne’ebé hamate Xefe Suku Guda, Cirilo Moniz, iha área Maravilla, postu administrativu Maliana, tanba laiha testemuña ne’ebé hakarak fó deklarasaun no falta CCTV ka kámara videovijilásia iha fatin akontesimentu.
“Ita buka hela karreta ne’ebé xefe suku ultrapasa hetan asidente ne’e atu foti sira-nia deklarasaun, komu ita-nia sidadaun sira iha terrenu la fó sai, ta’uk. Entaun, ida-ne’e mak difikuldade ba ita-nia seksaun tránzitu”, Segundu Segundu Komandante PNTL Bobonaru, Superintendenti Carlos Moniz, informa ba jornalista sira, ohin.
Nia dehan CCTV ne’ebé eziste iha sanulu mak funsiona, maibé iha fatin akontesimentu dezastre, iha loron 31, ne’e CCTV laiha.
Carlos Moniz relata kronolojia asidente ne’e pur vulta 07h15 lokraik, no envolve motorizada rua tipu Verza ne’ebé kondús hosi Xefe Suku Guda, Cirilo Moniz, no Revo-Fit ne’ebé kondús husi sidadaun ida ho naran Adão.
“Tuir informasaun, ita-nia xefe suku Matebian husi diresaun Maliana Vila atu bá Holsa, depois sidadaun ida ho Revo-Fit ne’e diresaun husi Holsa sa’e mai. Sira rua hasoru malu, ita-nia xefe suku tenta atu ultrapasa karreta ida iha oin, klaru ke ultrapasa nia sai husi nia diresaun, entaun nia bá hasoru kedas ho sidadaun Adão ne’ebé sae husi Holsa mai ne’e”, dehan.
Antigu segundu komandante Unidade Patrullamentu Fronteira (UPF) ne’e hateten katak impaktu kolizaun ne’e forte tebes tanba sira na’in rua ne’e alegadamente la’o ho velosidade aas no informasaun ne’ebé PNTL rekolla iha terrenu, matebian uza kapasete, maibé la kesi ho di’ak.
“Tuir informasaun ita-nia xefe suku ne’e influensia hela ho alcohol. Momentu ne’ebá prosesu imvestigasaun liga ho ita-nia xefe suku ne’e uza duni kapasete, entaun kuandu sira rua hasoru malu, xefe suku ne’e katik sai depois kapasete mós sai husi nia ulun, nia monu fali ba karreta oin. Ulun baku ba asphalt mak rezulta nia mate”, dehan.
Diretór-Ezekutivu Ospitál Referénsia Maliana, José Marçal da Cruz, dehan asidente ne’e pasiente ida la salva no ida seluk transfere bá Dili tanba kondisaun grave.
Sekretariu Autoridade Munisípiu Bobonaru ba Asuntu Sosiál no Organizasaun Komunitária, Júlio Carvalho Caero, hato’o sentidu kondolénsia ba familia enlutada no sente lakon líder komunitáriu di’ak ida.
Nia relata katak xefe suku ne’e husi Guda bá Maliana tanba asuntu serbisu nia, lori dadus vítima dezastre nian ba Autoridade Protesaun Sivíl (APC), munisípiu Bobonaru. “Nia iha responsablidade. Durante ne’e ha’u observa nia partisipa enkontru, fó opiniaun. Husu ba komunidade Guda simu ho neon boot tanba ne’e planu Maromak nian”, nia hato’o.
Júlio Carvalho Caero informa katak ho akontesimentu ne’e, Diresaun Nasionál Apoia Administrasaun Suku (DNAAS) atu halo prosesu subtituisaun. “Depoizde ai-funan 40 dias ami sei halo karta ida ba DNAAS para organiza malu fali hodi halo prosesu eleisaun ou atu nomeia fali sé mak atu jere suku Guda”, nia dehan.
Matebian Cirilo Moniz eleitu ba xefe suku foun Guda iha fulan-Outubru tinan 2023.
Jornalista: Sergio da Cruz
Editora: Maria Auxiliadora
