DILI, 14 fevereiru 2022 (TATOLI)–Diretór Estabelesimentu Prizionál Becora, João Domingos, hateten Prizaun Becora la’ós de’it fatin atu kastigu ema maibé eduka dadur sira liuhosi formasuan oioin, nune’e bainhira sira sai hosi komarka no re-integra fali ba komunidade ne’e bele sai ema-ne’ebé di’ak iha sosiedade nia leet.
Nia hateten, Organizasaun Naun Govermentál (ONG) Komunidade Sharis Haburas (SHC), segunda (14/02) ne’e realiza formasaun kona-ba HIV-SIDA ba prizioneiru Becora na’in-25 ho tema “Hasa’e Konsiénsia ba Maluk Prizioneiru sira Liuhosi Treinamentu Edukasaun Kolega ba Kolega hodi Prevene Moras Hada’et Sira hanesan HIV/SIDA no Moras Hada’et Relasaun Seksuál”, atu hatene kona-ba lala’ok hosi moras hada’et hirak ne’e.
Diretór Estabelesimentu Prizionál Becora, João Domingos. Imajen Tatoli/Nito dos Santos.
“Ita labele hanoin katak maluk sira iha prizaun atu komarka de’it maibé lori atu eduka sira. Entaun, atu eduka sira la’ós ko’alia de’it maibé oinsá halo prátika liuhosi guarda prizionál no sosiedade sira mak sai halo parte ba preparasaun ba prizioneiru sira ho di’ak molok sira fila ba nia komunidade mak liuhosi formasaun sira,” Diretór ne’e hateten ba Agência TATOLI iha Prizaun Becora, Dili, segunda ne’e.
Ho esperana ida-de’it mak prizioneiru sira nafatin iha esperansa ba moris no labele sente katak moris ida-ne’e mak nakukun, maibé ida-ne’e sai hanesan esperiénsia di’ak ba sira atu sai ema-ne’ebé mak di’ak ba sosiedade nia leet.
Diretór Ezekutivu Komunidade Sharis Haburas (SHC), Eusébio Abrantes, hateten objetivu hosi formasaun ne’e atu hasa’e koñesimentu ba maluk prizioneiru sira liuhosi formasaun edukasaun ba kolega dadur sira hodi prevene moras hadaet sira hanesan moras HIV/SIDA no Moras Hada’et Relasaun Seksuál (MHRS).
“Ita-nia objetivu hosi formasaun Kolega ba Kolega durante loron tolu (14-16/02) ba edukasaun prevensaun ba HIV/SIDA, MHRS, TBC no droga atu hasa’e konsiénsia atu sira besik ba klinika, nune’e atu tuir teste voluntáriu kona-ba moras hadaet sira. Ami halo ida-ne’e tanba sira sei foinsa’e no seluk tanba sira iha komarka tinan barak entaun bainhira sira sai presiza iha preparasaun di’ak tanba nesesidade prejudikamente biolojika ba foinsa’e sira fasil hetan, nune’e opurtunidade sira aprende atu prepara-an di’ak liután iha sosiedade,” nia dehan.
ONG SHC hahú hala’o ona atividade Programa Promove Moris saudável foka prevensaun moras hadaet inklui atividade Peer Education (PE) hahú kedas 2009-2020 iha Prizaun Timor-Leste ho apoiu fundu hosi doadór la hanesan UN-Team Group-UNDP, UNFPA. Fundo Global, Gove-TL.
Iha períodu refere atividade Edukasaun prevensaun moras hada’et ne’ebé mak ONG SHC hala’o no tuir baze dadus mak hanesan totál prizioneriu na’in-285 ne’ebé mak hetan ona formasaun peer education no hala’o ona peer autreach ba sira-nia belun hamutuk 1.723 iha Prizaun Becora no Gleno.
Formasaun ne’e kontinuasaun tanba formasaun ne’e hala’o iha tinan 2009 to’o agora, no totál ema-ne’ebé mak tuir formasaun hamutuk 285 no daudaun ne’e tuir hela formasaun ne’e hamutuk na’in-25.
Uluk liu, formasaun ne’e hetan apoiu hosi Gabinete Sosiedade Sívil no agora agora hetan fali apoiu hosi Servisu Apoiu Fundu Sosiedade liuhosi Auditóriu Sosiál ho osan totál $15,000 ba atividade iha Prizaun Gleno, Becora no Suai inklui atividade ida iha Manufahi
Jornalista : Osória Marques
Editór : Cancio Ximenes
