DILI (TATOLI) – Diretór Ezekutivu Centro Nasionál Chega (CNC), Hugo Fernandes ho ekipa konsellu administrasaun no estrutura ezekutivu mai hasoru malu ho Primeiru-Ministru (PM), Marí Alkatiri hodi relata servisu durante fulan tolu.
“Ami mai hato’o ami ninia relatóriu fulan tolu nia no hato’o mós agradesimentu ba Primeiru-Ministru vii governu konstitusionál ne’ebé mak kuaze tinan ida fó apoiu no orientasaun ba Centro Nasionál Chega”, tenik ba jornalista sira hafoin hasoru malu ho xefe governu iha Palásiu Governu, ohin.
Hodi hatutan, nu’udar órgaun ne’ebé CNC tutela ba no uza de’it rejime orsamentu duodecimo maibé gabinete primeiru-ministru kontinua apoiu husi parte polítika no tékniku ba implementasaun atividade, nune’e institutu ne’e prontu koopera ba governu foun tuir mai. Agradese mós ba kooperasaun ho ministériu relevante, institutu públiku no organizasaun sosiedade sivíl sira.
Hugu esplika, servisu ne’ebé sira halo mak oinsá atu asegura rekomendasaun CNC no Commission for Truth and Frienship Indonesia Timor-Leste (CTF) nian hodi bele tama iha polítika governu.
Bazeia ba ida ne’e CNC konsege submete ona ba gabinete Primeiru Ministru ezbosu dekretu governu oinsá proteje sítiu istóriku sira. “Ida ne’e Chega hato’o tanba iha preokupasaun boot katak ita nia fatin istóriku sira barak mak ema komesa abandona, balun transforma fali utilizasaun fatin seluk no ida ne’e sai preokupasaun tanba aban bain rua jerasaun foun labele hatene konaba fatin hirak ne’e”.
Maski la konsege diskute iha KM, maibé CNC hein katak governu tuir mai bele kontribui diskute dekretu governu ne’ebé sira prepara ona.
Entretantu, institutu públiku ne’ebé aprova husi reuniaun Konsellu Ministru (KM) VII governu konstitusionál iha loron 31 Outubru 2016 nu’udar “Centro Nacional Chega, IP”, foin hahú servisu dezde lansa iha loron 17 Jullu 2017 husi ex Primeiru-Ministru, Rui Maria de Araújo no momentu ne’ebá kedan halo tomada pose ba konsellu administrasaun no estrutura ezekutivu, maibé konsege halo ona servisu lubun.
Serbisu ne’ebé halo ona mak, liuhosi ministériu edukasaun no kultura (MEK), introdús no loke biblioteka chega iha eskola balun iha Dili laran ne’e no universidade ida no halo kolóquiu ho mestre sira konaba oinsá hanorin matéria istória iha eskola.
Alende ne’e, halo ezibisaun fotografia atu prezerva memória pasadu iha Palásiu Governu no halo lansa “Praça da Proclamação da Independência”, nu’udar inisiativa no proposta ba governu husi institutu ne’e rasik.
Horisehik CNC hamutuk ho Komité organizadora levantamentu Marabia, halo komemorasaun tinan 38 levantamentu Marabia nia.
Aleinde ida ne’e, CNC mós ativu halo workshop no semináriu hodi divulga informasaun konaba sítiu istóriku no fó rekomendasaun husi Comissão Acolhimentu Verdade e Reconsiliação (CAVR) no atividade seluk tan.
(Jornalista: Julia Chatarina)
(Editór : Manuel Pinto)
