BAUCAU, 18 marsu 2022 (TATOLI) – Ministru Administrasaun Estatál (MAE), Miguel Pereira de Carvalho, husu Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE, sigla portugés) atu serbisu tuir Lei Eleitorál ba Prezidente Repúblika no dekretu-governu nian hodi fó susesu ba eleisaun prezidensiál.
Ministru Administrasaun Estatal, Miguel Pereirra de Carvalho, hateten ohin iha territóriu laran hahú ona distribui materiál sensitivu no naun-sensitivu hamutuk sentru votasaun 1.200 no estasaun votu hamutuk 1.500.
“Entidade ne’ebé envolve iha prosesu eleisaun inklui povu aban sei ba vota, tenke halo buat hotu-hotu tuir deit Lei Eleitóral Prezidente Repúblika no dekretu governu sira-ne’ebé regula prosesu tomak,” Ministru Miguel hateten bainhira abertura distribusaun materiál prezidensiál iha Vila Nova, sesta ne’e.
Governante ne’e husu STAE nu’udar ezekutadór no CNE nu’udar orgaun suprevizaun atu hala’o servisu tuir mandatu hanesan ezekutadór no supervizór.
Governante ne’e enkoraja populasaun Baucau katak liuhosi eleisaun mak povu sei ezerse vontade atu determina pesoál ne’ebé reprezenta no lidera eleisaun hanesan prezidensiál no parlamentár iha nível nasionál no eleisaun podér lokál no líder komunitária sira.
Tanba ne’e husu entidade hotu atu garante eleisaun prezidensiál tinan 2022 ho demokrátiku, justu no livre.
“Hala’o de’it serbisu tuir lei no regulamentu sira hateten, ne’e ha’u hatete ba brigadista, ofisiál eleitorál no fiskál sira-ne’ebé aban sei hala’o serbisu ba eleisaun prezidensiál,” Miguel akresenta.
Durante prosesu eleisaun prezidensiál sei kontrola hosi fiskál kada kandidatura iha timor laran hamutuk rihun 23-resin, observadór internasionál hamutuk 30 mai hosi Uniaun Europea, CPLP inklui embaixada iha Timor-Leste hosi nasaun 17, jornalista nasionál hamutuk 248 no internasionál na’in-10.
Diretór STAE Baucau, Lúcio Freitas Salvador, garante asegura materiál eleisaun to’o iha sentru votasaun hamutuk 125 no estasaun votu hamutuk 150 iha Baucau tanba prepara másimu kondisaun hodi asegura urna to’o sentru votasaun sira.
Totál urna ne’ebé distribui ba sentru votasun no estasaun votu iha Baucau hamutu 457 no sei prepara urna rezervadu ba sentru votasaun sira tuir kondisaun eleitór sira.
STAE mós prepara transporte hamutuk 50-resin ne’ebé apoia hosi institusaun governu iha munisípiu Baucau hamutuk karreta 37, hosi nasionál kareta 12, aluga hamutuk 12
Durante distribusaun materiál sensitivu no la’ós-sensitivu to’o iha sentru votasaun sira sei resposabiliza hosi PNTL to’o dadersan molok entrega ba brigadista nu’udar prezidente sentru votasaun atu hahú loke sentru votasaun iha oras 06:00 dadeersan.
Notisia relevante: Xefe Estadu promulga alterasaun lei eleitorál ba Prezidente Repúblika
Jornalista : Natalino Belo
Editór : Evaristo Soares Martins
