DILI, 22 abril 2022 (TATOLI)–Primeiru-Ministru (PM), Taur Matan Ruak, bolu Ministru Transporte no Komunikasaun (MTK), José Agustinho da Silva, sesta ne’e, hodi justifika insidente ró ahi Berlin-Ramelau ne’ebé akontese foin lalais.
“Primeiru-Ministru alerta mai ha’u kona-ba ita-nia tripulante sira ne’ebé durante ne’e halo viajen. Bainhira ró sai no atraka sempre iha akontesimentu ruma, hanesan viajen dahuluk ró konsege kose, foin daudaun iha loron 17 abril bainhira transporta pasajeiru ba Oé-cusse, akontese insidente ida tan, kose ba portu Mahata hodi rezulta ró nia sorin kuak, distánsia hosi tasi-been to’o leten metru rua, ne’ebé momentu ne’ebá tékniku sira arranka no lori ró ho neneik hodi to’o hikas iha Dili ho kondisaun seguru,” Ministru informa ba jornalista sira hafoin hasoru Xefe Governu iha Rezidénsia Ofisiál, Farol.
Notísia relevante: APORTIL hein pesa hosi rai-li’ur hodi rezolve odamatan ró-ahi Berlin-Ramelau
Ministru dehan, ró Berlin-Ramelau daudaun para ona iha portu Dili no presiza foti desizaun emediata hodi hadi’a, nune’e bele fasilita komunidade halo movimentu.
“Ita iha ró-ahi maibé ema ne’ebé jere hosi estranjeiru, ho ida-ne’e Governu esforsu hodi bele promove no fó oportunidade ba timor-oan sira jere. Faktu hatudu tripulante ró Berlin-Ramelau maioria timor-oan, maibé ikus mai mosu insidente sira. Entaun ida-ne’e sei iha prosesu investigasaun nia laran,” governante ne’e klarifika.
Durante hasoru malu, Xefe Governu ho Ministru Agustinho diskute mós kona-ba infraestrutura atu hadi’a ró.
“Ita seidauk iha infraestrutura, tanba ne’e kada tinan ró-ahi ne’ebé iha sempre lori halo manutensaun iha rai-li’ur, bainhira desloka presiza kustu boot no tenki buka ró seluk subtitui asegura konetividade. Tanba ne’e ba oin Governu iha nesesidade urjente iha infraestrutura rasik atubele hadi’a ró iha rai-laran,” Ministru tenik.
Jornalista : Antónia Gusmão
Editora : Julia Chatarina
