DILI, 28 jullu 2022 (TATOLI)—Primeiru-Ministru (PM), Taur Matan Ruak, husu populasaun labele pániku ho informasaun ne’ebé espalla daudaun katak kombustivel laiha ona tanba agora daudaun kombustivel litru millaun haat (4) mak deskarega ka to’o ona iha Timor-Leste.
“Ohin, Ministéiru Petróleu no Minerál (MPM) informa ona ba ha’u daudaun ne’e Pertamina nia ró boot ida lori kuaze gazoel no gazolina litru millaun haat (4) ne’ebé iha ona tasi laran ne’e, sira deskarega. Orsida lorokraik no aban problema ida-ne’e laiha. Entaun apela ba populasaun sira lalika pániku,” PM Taur hateten ba jornalista sira hafoin ramata enkontru ho Prezidente Repúblika, José Ramos Horta iha Palásiu Prezidensiál Nicolau Lobato, Bairru Pite, kinta ne’e.
Tan ne’e, Xefe Governu apela ba públika atu labele pániku ho informasaun ne’ebé espalla tanba situasaun uluk nian liu-liu iha tempu funu ne’e pior liu ida-ne’e.
“Uluk situasaun piór liu ida-ne’e mós ita bele jagoan loos, agora mina atu maran ne’e ita halai monu mate an. Mina laiha para tiha motor no karreta, lao ain. Maromak tau ita-nia ain atu la’o. Ami la’o tinan 20 iha ai-laran, ami bele. Agora imi la’o fali ladi’ak hotu. Tanba saida mak ladi’ak,” PM Taur ko’alia ho hamnasa.
Durante sorumutu ho Xefe estadu, PM mós relata Xefe Estadu atu labele preokupa tanba primeiru tenke konfia empreza sira-ne’ebé hala’o hela atividade no Governu mós iha empreza estatál atu bele responde.
“Ha’u informa ba Prezidente Repúblika boatu sira-ne’ebé la’o iha ita-nia rai-laran katak mina sei laiha no sei maran, entaun dehan ba Prezidente Repúblika katak ita lalika preokupa ida-ne’e tanba primeiru ita sei konfia iha empreza sira-ne’ebé halo hela sira-nia atividade maibé em caso de extrema nesesidade Governu iha empreza estatál ida Timor Gap bele ativa, tanba ne’e tenke haree ho seguransa ita-nia nasaun nian,” Xefe Governu garante.
ANPM dezmente kuantidade kombustivel menus
Entretantu, liuhosi komunikadu imprensa, Autoridade Nacional do Petróleu no Minerál (ANPM), desmente kuantidade kombustivel menus iha Timor Leste.
ANPM hakarak informa ba publiku katak fornesimentu (Stock) kombustivel (Gazolina no Gazoel) iha armajen boot rua hanesan Pertamina International Timor (PITSA) iha Praia dos Coqueiros no Esperanca Timor Oan (ETO) iha Hera sufisiente hela hodi bele atende nesesidade konsumidór sira iha Timor laran tomak.
ANPM mós hakarak informa katak oras ne’e daudaun Ró tula kombustivel atraka ona iha Ponte Kais Armajen Kompañia PITSA nian no sei halo deskaregamentu ohin loron kuantidade Gazolina hamutuk litru tokon rua-resin (2.494.372 litru) no Gazoel tokon ida (1)-resin (1.632.203 litru).
Enkuantu ANPM sei konfirma kuantidade kombustivel iha Armajen Kompañia ETO nian, maske nune’e, kompania ETO fó sai ona iha sira-nia pájina mídia sosiál katak sira iha mina rezerva kuantidade ne’ebé sufisiente.
Kompañia PITSA no ETO hanesan distributór boot rua iha Timor-Leste sempre importa kombustivel tuir kalendariu importasaun nomós depende ba nesesidade iha rai-laran. To’o agora laiha interupsaun ba kalendáriu importasaun kombustivel.
Ho nune’e ANPM apela ba publiku katak atu la presiza pániku ho rumor ka boatus kona-ba kombustivel menus iha armajen ho retallu sira. Ho kolaborasaun di’ak tomak hamutuk ho importadór sira ho postu abastesimentu kombustivel sira hotu ANPM sei garantia distribuisaun kombustivel iha merkadu ho efetivu no efikas.
Jornalista : Nelson de Sousa
Editór : Cancio Ximenes
