VIQUEQUE, 17 agostu 2022 (TATOLI)-–Responsável postu saúde suku Uma-uain leten, Francisco da Costa, informa, postu saúde ne’e daudaun falta bee-moos hodi uza ba nesesidade loron-loron.
“Dezafiu ne’ebé ami enfrenta uluk maka bee-moos. Uluk bee tama iha ne’e maibé la kleur maran to’o agora, dezafiu seluk maka komunidade ladún koopera ho ami, maibé ami sempre halo koordenasaun di’ak ho autoridade sira,” Francisco da Costa hateten ba Agência Tatoli, iha postu saúde suku Uma-uain leten, kuarta ne’e.
Daudaun pesoál saúde sira ho inisiativa sosa sanyo liga bee hosi mota Luga-Asa nian ba postu saúde.
“Preokupasaun ne’e ami hato’o ona ba ami-nia xefe iha sentru saúde no hato’o tutan ona ba Diretór Saúde Viqueque maibé laiha resposta ruma,” nia akresenta.
Notísia relevante: Postu saúde Afaloikai rejista ISPA hamutuk 200
Aleinde ne’e, parte responsável sempre halo relatóriu mensál ba sentru saúde Viqueque kona-ba ai-moruk.
“Daudaun ne’e stock ai-moruk iha postu saúde sei sufisente, maibé ai-moruk parcetamol maka hela tablet 100 ba fulan-ida nia. Ha’u haree la sufisente,” nia tenik.
Postu saúde ne’e mós rejista moras Insfeksaun Respiratóriu Aguda (ISPA) hosi juñu to’o jullu hamutuk 250 no moras katar 67.
“Kada fulan ami hato’o relatóriu ba sentru saúde ne’e, kazu moras ho númeru a’as maka ISPA. Tempu agora atu tama ba bailoron ne’e númeru sei aumeta tanba impaktu mai hosi rai-rahun. Tanba ne’e, ami apela ba komunidade atu uza maskára, maski ita livre ona hosi Corona maibé nafatin uza hodi halo prevensaun ba moras ISPA,” Responsável postu dehan.
Postu saúde suku Uma-uain Kraik kada loron sempre fó atendimentu ba abitante 30 resin.
“Ami na’in-haat serbisu iha postu saúde no voluntáriu na’in-rua. Ami sente menus rekursu, liu-liu farmasista, tanba laiha ne’ebé ami serbisu doubru, atende ba pasiente hotu ba fahe tan ai-moruk. Ami hakarak koloka mós formasista ida mai iha ne’e hodi fahe ai-moruk,” nia subliña.
Pesoál saúde ne’ebé destaka iha postu saúde kompostu hosi médiku ida, enfermeiru ida, parteira ida, saúde públika ida, voluntáriu enfermeiru ida no saúde públiku ida.
Jornalista : Vitorino Lopes da Costa
Editora : Julia Chatarina
