VIQUEQUE, 12 agostu 2022 (TATOLI)–Postu saúde Afaloikai, postu administrativu Uatulari, munisípiu Viqueque hosi fulan-janeiru to’o jullu rejista kazu moras infesaunn respiratóriu aguda (ISPA) hamutuk 200.
“Ami rejista moras ISPA hamutuk 200, tuir maka moras sira seluk hannesan diarea 21, no moras pneumia 10, nune’e janeiru to’o jullu rejista moras hamutuk 231,” Doutór postu saúde Afaloikai, Abito Soares Menezes, hateten iha postu saúde Uatulari, sesta ne’e.
Kada loron pesoál saúde sempre halo atendimentu ba pasiente sira ne’ebé mai halo tratamentu iha postu saúde Afaloikai.
“Ami loron-loron sempre fó atendimentu ba ita-nia komunidade suku Afaloikai, loron ida dala ruma ami fó atendimentu ba pasiente 30. Ami halo atendementu ba komunidade sira hahú tuku 08:00 dadeer to’o tuku 21:00 kalan,” nia akresenta.
Notísia relevante: Jullu, Klínika Bairru Pité rejista pasiente ISPA na’in-353
Maski nune’e, dazafiu ne’ebé pesoál saúde iha postu saúde Afaloikai enfrenta maka menus pesoál saúde, menus espasu (iha sala tolu) no laiha bee-moos.
“Bee-moos importante tanba molok atende pasiente, pesoál saúde sira presiza fase liman hafoin fó atendimentu ba pasiente. Ami bee laiha ne’ebé komunidade maka oferese sira-nia bee maka ami uza de’it. Tanba ne’e, ami husu na’i-ulun sira presiza haree ami-nia preokupasaun sira ne’e. Ami presiza tan framasista ida hodi fó atendimentu ba komunidade,” nia tenik.
Pesoál saúde ne’ebé destaka iha postu saúde mak hanesan parteira ida maibé daudaun ho kondisaun moras, doutór ida, enfermeiru ida no saúde públika ida, voluntáriu ida.
Jornalista : Vitorino Lopes da Costa
Editora : Julia Chatarina
