DILI, 10 agostu 2022 (TATOLI)—Diretór Ezekutivu Klínika Bairru Pité, Inacio dos santos, informa iha fulan jullu moras Infensaun vias Respiratóriu Aguda (ISPA) rejista aas iha klínika ne’e.
“Iha fulan jullu, ita rejista pasiente moras Infensaun Vias Respiratoriu aguda ka ISPA na’in-353 no tuir mak moras kulit no moras seluk hamutuk 139,” Diretór Ezekutivu ne’e informa ba Agência TATOLI iha nia kna’ar fatin-Bairru Pité-Dili, kuarta ne’e.
Notísia relevante: Semana ne’e, Klínika Bairru Pité hahú reativa funsionamentu sala maternidade
Hosi totál pasiente ISPA 355 maioria afetadu ba labarik sira idade menus tinan lima mai kraik no moras kulit no seluk tan afeta ba ema boot. Kauza ba moras ISPA no moras kulit seluk tanba bailoron ne’ebé komesa iha rai rahun maka’as.
Alende ne’e, Inan isin-rua sira ne’ebé mai konsulta hamutuk 300 inklui pasiente moras hipertensaun 100-resin, no mós moras diabetes 20.
“Ita mós rejista kazu dengue hamutuk 38, asidente trafégu hamutuk 37, diareia aguda na’in-89, no diareia ho raan na’in-neen,” Nia informa.
Kona-bá medikamentu, nia dehan iha klínika ne’e sufisiente hela hodi halo atendimentu ka fó ba pasiente sira ne’ebé mai konsulta.
Notísia relevante: Laiha rekursu, kankru raan hamate ema na’in-neen
Jornalista : Felicidade Ximenes
Editór : Florencio Miranda Ximenes
