VIQUEQUE, 24 agostu 2022 (TATOLI)–Xefe sentru saúde postu Uatucarbau, Jeremias Mota, informa implementasaun programa ‘saúde na família’ iha postu Uatucarbau, munisípiu Viqueque daudaun ne’e la’o di’ak.
“Kona-ba implementasaun programa saúde na família iha postu Uatucarbau kuaze la’o di’ak. Programa ne’e ho objetivu ita atu hakbesik atendimentu saúde ba ita-nia komunidade hodi identifika moras,” Xefe sentru saúde hateten ba Agência Tatoli iha postu administrativu Uatucarbau, kuarta ne’e.
Notísia relevante: Orsamentu Afeta Ba Sistema Rejistu “Saúde na Família”
Programa saúde na família iha postu ne’e implementa iha suku neen, ne’ebé ekipa saúde sira kuaze la’o hotu ona hein halo diagnóstika partisipativu hodi fó sai ba komunidade.
“Programa ne’e la’o hotu ona, hein halo diagnóstika partisipativu hodi fó sai ba komunidade, liu-liu moras sira ne’ebé maka daet barak iha kada suku neen nian laran, maibé tempu badak sei fó sai ba komunidade,” nia tenik.
Ekipa saúde tuun direta ba komunidade nia uma hodi haree kondisaun saúde.
“Daudaun ami koloka ona pesoál saúde sira iha postu saúde iha suku Afaloikai iha pesoál saúde tolu, suku Bahatata iha pesoal saúde haat, suku Loiulu iha pesoál saúde tolu, suku irabin de Cima iha pesoál saúde rua, suku Uani Uma iha pesoál saúde tolu. Maibé pesoál saúde maka sei menus, tuir loloos iha postu saúde ida iha pesoál saúde hitu, nune’e foin lalais enkontru iha Baucau ha’u relata ona ba Ministériu Saúde hodi kompleta pesoál saúde,” nia akresenta.
Nia dehan, programa saúde na familia kada tinan sei kontinu implementa hodi pesoál saúde sira bele kobre família hotu ne’ebé maka iha postu Uatucarbau.
Jornalista : Vitorino Lopes da Costa
Editora : Julia Chatarina
