DILI, 28 agostu 2022 (TATOLI)–Diretór Nasionál Dezenvolvimentu Parque Eskolár (DNDPE) Agostinho Soares, relata eskola 13 iha munisípiu lima ne’ebé tama iha projetu komunitária daudaun ne’e sofre orsamentu kuaze 8,3%.
Maibe, nia dehan, parte Governu promete ona katak bainhira projetu 13 ne’e atinje ona 75% sei hetan fila-fali rekuperasaun orsamentu hosi Ajénsia Dezenvolvimentu Nasionál (ADN).
“Ha’u hakarak informa ba públiku katak eskola 13 ne’ebé sofre orsamentu 8,3% ne’e akontese ba eskola lima iha Viqueque, eskola haat iha Aileu, eskola rua iha Bobonaro, eskola ida iha Dili no eskola ida iha Ermera. Projetu 13 ne’ebé sofre orsamentu ne’e kompostu hosi edukasaun pre-eskolár (EPE) haat (4) edukasaun báziku (EB) hitu (7) inklui ensinu sekundáriu jerál (ESJ) rua (2),” Agostinho Soares informa ba Agência Tatoli liuhosi telefónika, domingu ne’e.
Eskola lima iha Viqueque ne’e mak pre-eskolár Maria Lobato Raitahu, Pre-eskolár Uaibua, EBC Kabira-oan, ESJ Olokasa no EBC 2, 3 Uatucarbau. Hosi fali munisípiu Aileu iha eskola haat mak Pre-eskolár Katobauru, EBF Urbadan, EBF Teblor no EBF Manu-kasa.
Hosi munisípiu Bobonaro iha eskola rua maka eskola ESJ Dom Martinho Maliana no Pre-eskolár Holsa. Enkuantu iha Dili no Ermera eskola ida-ida de’it maka EBC 30 de agostu Comoro no EBF Sin-Lelu.
Maibé projetu 13 ne’ebé hetan ona dedusaun 8,3% ne’e konserteza sei iha implikasaun maibé ADN ho DNDPE halo ona konkordánsia katak bainhira projetu 13 ne’e ninia progresu kuandu atinje ona 75%, DNDPE bele halo fila-fali pedidu autorizasaun ba fali ADN hodi hetan autorizasaun atu asesu fali orsamentu ne’ebé dedusaun ne’e.
Ne’ebé dedusaun ne’e ninia intensaun atu asegura de’it orsamentu sira-ne’e hodi bele halo akompañamentu ba projetu 13 ninia progresu. Maibé bainhira atu to’o 100% mak sente iha difikuldade ho orsamentu MEJD liuhosi DNDPE sei husu fali levantamentu ba AND. maibé bainhira to’o ona 75% mak projetu 13 ne’e sente disponivel hela ho orsamentu ne’ebé iha entaun orsamentu ne’ebé dedusaun ne’e fila-fali ba kofre Estadu.
“orsamentu dedusaun ona ne’e sei lalakon, ida-ne’e hanesan jestaun ida atu nune’e ita bele kuidadu liu,” nia hateten.
Jornalista : Tomé Amado
Editór : Cancio Ximenes
