DILI, 09 Juñu 2026 (TATOLI)-Komisaun F ne’ebé trata Asuntu Saúde, Igualdade Jéneru no Inkluzaun Sosiál, rekomenda ba Ministériu Saúde (MS) atu reforsa estabelesimentu saúde sira iha munisípiu Vikeke hodi bele fó atendimentu di’ak liután ba komunidade.
Sekretária Komisaun F, Lúcia Taeki, hato’o sujestaun ne’e iha reuniaun plenária Parlamentu Nasional, ohin, hodi aprezenta relatóriu fiskalizasaun Komisaun nian ne’ebé foin lala’is bá iha munisípiu referidu hodi haree direta estabelesimentu saúde sira-nia funsionamentu servisu iha baze no rona preokupasaun sira.
Nia dehan, husi atividade ida-ne’e, Komisaun konklui katak ekipamentu iha sentru no postu saúde sira kontinua iha limitasaun, maibé serbisu atendimentu husi profisionál saúde ba komunidade la’o normál.
Kestaun seluk identifika rekursu umanu ne’ebé destakadu iha servisu saúde munisípiu seidauk kompleta mapeamentu munisipál no serbisu saúde munisipál halo ona identifikasaun ba nesesidade konstrusaun no reabilitasaun fasilidade saúde sira, maibé seidauk konkretiza iha planu asaun anuál.
“Menus disponibilidade bee-moos, eletrisidade no transporte iha sentru no postu saúde sira, hodi apoiu servisu profisionál saúde iha implementasaun programa no atividade sira”, nia hato’o.
Tanba ne’e, rekomenda ba MS atu kompleta númeru rekursu umanu konforme mapeamentu munisípiu, ba sentru no postu saúde sira iha Vikeke.
Reforsa disponibilidade ekipamentu médiku, medikamentu konsumivel, reajente, bee-moos no transporte iha estabelesimentu saúde sira.
“Tau prioridade no konsiderasaun ba nesesidade konstrusaun no reabilitasaun fasilidade saúde sira ne’ebé presiza konstrusaun no reabilitasaun urjente”, dehan.
Hodi husu reforsa liña koordenasaun interministeriál ho entidade relevante atu solusiona problema ne’ebé identifika iha estabelesimentu saúde sira. Reforsa disponibilidade no manutensaun ba karreta multifunsaun no motorizada atu reforsa servisu atendimentu ba komunidade.
Jornalista: Nelson de Sousa
Editora: Maria Auxiliadora
