BAUCAU, 05 setembru 2022 (TATOLI) – Autoridade postu administrativu Baucau Vila, hahú implementa Programa Mão de Obra Postu Administrativu (PMOPA) iha suku 11.
Administradór postu administrativu Baucau Vila, Isencinio António da Silva, esplika, lansamentu ba programa refere iha loron 31 agostu no hahú implementa iha loron 1 fulan-setembru no tuir planu sei hala’o durante loron-18 ne’ebé sei finaliza iha fulan-setembru nia laran.
“Ajuda tebes tanba orsamentu mai hosi retifikativu ho objetivu hadi’a ekonomia uma-laran liuhosi serbisu PMOPA,” Administradór postu administrativu Baucau Vila informa ba TATOLI iha Vila Nova, segunda ne’e.
PMOPA iha postu administrativu Baucau vila sei implementa atividade hamutuk 33 hanesan limpeza jerál, reparasaun estrada eskala kiik ne’ebé kada suku fahe ba grupu tolu, ho totál traballadór hamutuk 660 hosi suku 11.
Hosi traballadór na’in-660 ho durasaun kontratu loron-18, kada loron sei iha direitu $5 no kada xefe grupu na’in-ida $7.
Postu administrativu Baucau Vila hetan alokasaun orsamentu ba implementasuan PMOPA hamutuk $137.41,33 ne’ebé sei aloka ba operasionál 5% no 95% ba kustu investimentu.
“Ha’u oreinta ona ekipa hamutuk ho ekipa PDIM hosi munisípiu bele tún direita observa iha terrenu kona-ba atividade refere,” Isencinio António da Silva akresenta.
Governu aprova PMOPA aloka fundu hamutuk millaun $ 7,2, liuhosi transferénsia ba kada konta bankária munisípiu tuir dekretu lei númeru 3/2016, hodi implementa sub-atividade hamutuk rihun 35 iha territóriu nasionál, ne’ebé tuir planu sei fó serbisu diária ba traballadór informál purvolta rihun 67.
Jornalista : Natalino Belo
Editór : Evaristo Soares Martins
