VIQUEQUE, 26 setembru 2022 (TATOLI)–Diresaun Nasionál Transporte Terreste (DNTT) munisípiu Viqueque identifika ona rai iha aldeia Buanurak, suku Uabubu, postu Ossu, munisípiu Viqueque atu harii terminál iha tinan 2023.
“Komunidade Baunurak oferese rai gratuita ho medida ektare 1 resin ba Governu hodi harii terminál ba transporte públiku,” Diretór Servisu DNTT munisípiu Viqueque, Elvino da Cruz, informa ba Agência Tatoli, iha ninia knaar fatin, Beloi, segunda ne’e.
Tuir dirijente ne’e, fatin harii terminál sei fahe ba rua, ida ba pasajeiru no seluk ba sasán nian.
Notísia relevante: Governu sei prepara terminál molok operasionaliza bus DAMRI
Asian Development Bank (ADB) daudaun halo hela preparasaun dezeñu no Bill of Quantity (BoQ), koordena ho DNTT nasionál no ekipa hosi Ministériu Transporte Komunikasaun (MTK) hodi halo preparasaun nune’e bele tama planu 2023.
“Sira halo estudu viabilidade ba rai no prepara dezeñu inklui BoQ iha tinan ne’e, nune’e konstrusaun bele hahú iha tinan 2023,” nia akresenta.
Maski nune’e, nia la fó sai kustu ba obra ne’e rasik tanba ADB sei halo kalkulasaun.
Nia dehan, DNTT no Tránzitu durante ne’e hasoru difikuldade halo kontrolu ba sirkulasaun transporte bainhira terminál laiha.
“Ami hasoru difikuldade durante laiha terminál, enkuantu seksaun Tránzitu hasoru difikuldade kontrola transporte,” nia tenik.
Jornalista : Vitorino Lopes da Costa
Editora : Julia Chatarina
