DILI, 12 outubru 2022 (TATOLI)—Institut Politékniku Betano (IPB) halo audiénsia públika ho Komisaun G ne’ebé trata asuntu edukasaun, kultura, juventude, desportu no sidadania, ba orsamentu ho montante $1.211.679 hodi realiza prograa prioridade rua iha tinan 2023.
Prezidente IPB, Acácio Cardoso Amaral, hateten, programa prioridade rua ne’e trasa ona no akumula atividade sub programa tolu hanesan boa governasaun ho sub programa rua no programa edukasaun no formasaun akumula sub programa ida.
“Orsamentu tinan 2023 mantein nafatin hanesan orsamentu tinan 2022, ne’ebé aumenta de’it $10.000, ne’ebé ami-nia programa antes ne’e iha de’it sia agora aumenta ba 11,” Prezidente IPB hateten foin lalais ne’e, iha resintu Parlamentu Nasionál.
Notísia relevante: Projetu konstrusaun IPB hatuur objetivu hakbiit rekursu umanu ho kualidade
Tuir Prezidente, maski iha aumentu oituan maibé la signifikante, tanba ne’e kontinua mantein nafatin atividade rutina ne’ebé mak trasa ona iha tinan 2022.
“Imi hatene ho didi’ak atividade sira ne’ebé maka hala’o iha ensinu superiór ne’e maka programa estájiu, prátika inklui saláriu no vensimentu, ne’ebé kuaze laiha diferensa, saida maka ami halo ona iha tinan kotuk tanba ami-nia orsamentu la aumenta signifikante,” nia tenik.
Iha fatin hanesan, Prezidente Komisaun G, Deputadu António Verdial, deklara laiha problema ho orsamentu IPB.
“Maski Governu deside ona, maibé Parlamentu Nasionál ne’ebé halibur ema polítiku iha devér atu haree sasán sira ho loloos, karik iha posibilidade bele muda filafali orsamentu sira ne’e hosi item ida ba fali item seluk. Ezemplu kiik ida karik atu halo estrada ida maka orsamentu ne’e boot liu bele muda hodi dezenvolve fali edukasaun atubele garante kualidade iha futuru,” nia tenik.
Jornalista : Tomé Amado
Editora : Julia Chatarina
