DILI, 17 outubru 2022 (TATOLI) – Asian Development Bank (ADB) investe millaun $3 iha Timor-Leste hodi serbisu hamutuk ho Ministériu Finansa (MF) no Ministériu Agrikultura no Peska (MAP) inklui parseiru sira atu rekupera má-nutrisaun no liña probreza iha munisipíu lima.
Vise-Ministru Finansa (MF), António Freitas Belo, hatete, misaun ADB ba projetu ne’e iha ona Timor-Leste no submete ona iha Prezidente Repúblika, atu halo deskusaun ho MF no MAP tanba misaun ne’e rasik ADB sira investe millaun $3, atu halo reabilitasaun plantasaun kafé, liuliu ba má-nutrisaun.
“Ita identifika ona iha munisipíu lima maka sei serbisu hamutuk ho ADB, neste mumentu MF ho MAP atu serbisu hamutuk hodi haree munisipíu lima ne’ebé maka sei tama iha projetu ADB no agrikultura nian, ho nia kritéria ne’e maka, munisipíu sira-ne’ebé hetan afetasaun ba nível pobreza ka kiak, no mós má-nutrsisaun, nune’e ita bele promove programa agrikultura nian,” António Freitas Belo, informa ba jornalista sira hafoin relata relatóriu misaun banku aziátiku nian ba Primeiru Ministru iha rezidénsia Faról, segunda ne’e.
Governante ne’e informa, daudaun ne’e munisipíu lima iha hela faze konsultasaun no mós estudu ho MAP, komposta hosi Atauro, Manatutu, Manufahi, Rejiaun Administrativa Espesiál Oé-Cusse Ambeno (RAEOA) no Díli espesífika liu ba Metinaro tanba menus bee-moos.
“Munisipíu lima ne’e infrenta problema bee-moos, maibé ho programa ne’e bele motiva agrikultór sira atu halo sira-nia toos no natar,” nia afirma.
Maske nune’e, Vise-Ministru ne’e fundamenta, Primeiru Ministru rasik mós iha programa prioridade ida, kona-bá kadea development bazea ba orientasaun Xefe Governu nian, tán ne’e MF no MAP realiza diskusaun ida ho parseiriu sira, liuliu ho ADB atu haree posibilidade oinsá mak atu investe liu iha agrikultura atu promove produtu lokál iha rai laran, liuliu ho kadea de valór no mós haree asuntu mudansa klimátika.
Jornalista: Abílio Elo Nini
Editór: Evaristo Soares Martins
