OÉ-CUSSE, 25 outubru 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), sei halo reanunsia konkursu públiku ba konstrusaun futuru edifísiu RAEOA, daudaun ne’e abandona hela kuaze fulan ida ona.
Prezidente Autoridade RAEOA, Arsénio Paixão Bano, argumenta, razaun abandona tanba autoridade maka termina kontratu ho empreza tanba la kumpre kontratu, maske autoridade halo ajenda beibeik, maibé laiha mudansa ba progresu, nune’e autoridade deside atu loke fali konkursu foun ba kompañia seluk atu kontinua konstrusaun ne’e.
“Kompañia la abandona, ita mak termina no hapara kontratu tanba la kumpri kontratu, agora iha hela prosesu halo levantamentu finál atu hatene, sira kumpre kontratu to’o persentajen hira nune’e depois ita halo fali prosesu foun konkursu públiku, kompañia semak atu halo kontratu hodi kontinua edifísiu administrasaun foun ne’e,” Arsénio Paixão Bano, informa ba jornalista iha Oé-Cusse, tersa ne’e.
“Ita la abandona tanba orsamentu iha hela tanba ne’e projetu multianuál, Autoridade konsege fó sai aviza dala hira ona, negosiasaun mós la’o maibé nafatin la kumpre entaun RAEOA deside termina kontratu, hodi foti dalan foun atu kontinua ho prosesu seluk, maka sei halo konkursu foun ba konstrusaun ne’e,” nia afirma.
Tuir Arsénio Bano, planu atu loke konkursu foun, sei persiza fulan ida tanba daudaun ne’e iha hela prosesu levantamentu ba konstrusaun no identifikasaun kona-bá fasilidade sira-ne’ebé kompañia fornese ona, no mós obra ne’e nia porsentu, inklui orsamentu ne’ebé gasta ona ba obra ne’e.
“Entaun ita mós presiza asegura sasán garantia ne’ebé mak ita halo, nia prosesu fulan ida konklui, ita kontinua prosesa kedas ba konkursu foun fali, ne’ebé ha’u atu reafirma katak kompañia la abandona serbisu, ita mak termina kontratu, ita mós la abandona serbisu tanba ita kontrola obra ne’e maka ita haree katak nia labele, rezultadu fiskalizasaun hatete, entaun ita bele termina kontratu, hodi loke fali konkursu foun ba kompañia seluk atu kontinua obra ne’e,” nia katak.
Tuir observasaun Jornalista Agência Tatoli, daudaun ne’e obra ne’e parte Polísia Nasionál Timor-Leste (PNTL) kontinua asegura hela materiál sira, tanba parte rua enkamiña ba Tribunál.
Nune’e Komandante PNTL RAEOA, Superintendente Xefe, Mateus Mendes Assunção, esplika, razaun PNTL asegura tanba antes ne’e parte komandu simu orientasaun hosi Autoridade RAEOA hodi destaka seguransa atu asegura materiál sira iha konstrusaun laran tanba prosesu justisa sei la’o hela.
“Konstrusaun ne’e entre kompañia ho Autoridade RAEOA maka halo kontratu, ha’u mós ladún akompañia nia durasaun kontratu, maibé foin daudaun ne’e Autoridade fó orientasaun mai ha’u, atubele segel fatin ne’e, nune’e kompañia labele hasai sasán hosi fatin konstrusaun ne’e, ho prevensaun ida-ne’e maka autoridade husu PNTL atu destaka nia seguransa iha obra ne’e, tanba prosesu ne’e iha ona Ministériu Públiku atu enkamiña ba Tribunál, maibé nia prosesu ha’u mós lahatene,” nia katak.
Entretantu, konstrusaun ne’e ezekuta hosi empreza internasionál SAMHEE LTD, ho valór kontratu US$10,900,033.37, ne’eb’e Autoridade RAEOA prevee hosi Orsamentu Jerál Estadu (OJE) 2016 ho durasaun serbisu durante fulan 18, empreza hahú konstrusaun ne’e iha 01 fevereiru 2017 no tenke remata iha 2018.
Notísia relevante: Konstrusaun edífisiu administrásaun RAEOA atinje ona 46%
Jornalista : Abílio Elo Nini
Editór : Evaristo Soares Martins
