BOBONARO, 26 outubru 2022 (TATOLI)-Sentru Solidariedade Sosiál no Inkluzaun munisípiu Bobonaro, rejista xefe família hamutuk 28,553 mak atu asesu subsídiu uma-kain ‘tinan nia rohan’ $200 ne’ebé tuir planu sei lansa iha loron 16 fulan-novembru tinan 2022.
Koordenadór jerál prosesu pagamentu munisípiu Bobonaro, Francisco Tilman, esplika, tuir lista anteriór ne’ebé autoridade lokál sira aprezenta hosi totál aldeia 193, suku 50, postu administrativu neen iha xefe família hamutuk 29,981, maibé hosi númeru ne’e 1,428 mak labele konsidera iha tinan ne’e tanba forma família foun.
Bazea ba dekretu-lei númeru 37/2022, loron 25 maiu, hateten, benefisiáriu sira ba subsídiu ne’e uma-kain ne’ebé rejista iha livru suku iha territóriu nasionál, ne’ebé haktuir mós iha diploma ministeriál númeru 49/2017, 23 agostu, rejista to’o loron 28 fulan fevereiru tinan 2022.
Notísiaia relevante: Subsídiu $200, PR Horta prefere fó ba uma-kain ho rendimentu ki’ik
“Ita iha totál benefisiáriu ba munisípiu Bobonaro hamutuk 28,553, ho totál orsamentu ne’ebé sei aloka mai munisípiu Bobonaro hamutuk $5,710.600,” Francisco fó-sai dadus ne’e durante halo disseminasaun dekretu-lei pagamanetu subsídiu fim do ano ba autoridade lokál sira no Ofisiál Polísia Suku (OPS) sira iha Jináziu Maliana, kinta ne’e.
Nia hatutan, prosesu pagamentu sei realiza durante loron 14 no benifisiáriu sira tenke lori ho dokumentu komprovativu sira hanesan; fixa famílialia, kartaun eleitorál no billete identidade (BI).
“Ha’u husu ba ‘ama-nai’ sira atubele fasilita ita-nia komunidade sira bele foti sira-nia direitu tuir tempu ne’ebé ita hatene, husu mós ba ita-nia OPS sira atu fó seguransa másimu ba prosesu pagamentu ne’e bele la’o ho di’ak to’o remata,” Francisco dehan.
Prezidente Autoridade Munisípiu Bobonaro, Ernesto de Oliveira Barreto, apela ba autoridade lokál sira atu hatutan baze legál sira-ne’ebé governu fó-sai ona nune’e iha prosesu pagamentu ne’e família foun sira naran la tama iha lista labele kestiona.
“Sira ne’e la signifika la hetan ona, iha tinan 2023 nia bele hetan fali,” nia argumenta.
“Governu halo buat sira-ne’e la barak, maizumenus Natál no tinan foun ne’e nia bele hola manu ida bele menikmati iha ninia família nia laran,” Prezidente Autoridade Munisípiu Bobonaro ne’e hateten.
Notísia relevante: Governu mantein desizaun atribui subsídiu $200 ba uma-kain hotu
Jornalista: Sérgio da Cruz
Editór: Evaristo Soares Martins
