DILI, 25 outubru 2022 (TATOLI)— Prezidente Repúblika, José Ramos Horta, hateten simu ona alterasaun dahuluk dekretu-lei númeru 37/2022, loron 25 maiu, kona-ba subsídiu “fim do ano” ho montante $200 ba uma-kain hotu iha territtóriu nasionál.
“Dekretu-lei ne’e iha ona ha’u nia meza leten. Ha’u seidauk iha desizaun ba ida ne’e. Ha’u sei haree lai molok foti desizaun atu veta ou promulga”, hateten PR Horta ba jornalista sira iha Kuartél Jenerál F-FDTL-Fatuhada-Dili, tersa ne’e.
Notísia relevante: Membru Governu deside la simu subsídiu $200
PR Horta prefere liu mak dekretu-lei anteriór ne’ebé atu atribui subsídiu $200 ne’e fó de’it oportunidade ba sidadaun sira ne’ebé mak vuneravél ka rendimentu ki’ik.
“Ha’u gosta liu lei ida anteriór, lei ida anteriór Governu halo ne’e maka di’ak loos. Tanba subsídiu ba uma-kain sira ne’e fó ba ema ki’ak liu, lalika fó ba hotu hotu. Nune’e ha’u sei halo reflesaun didi’ak. Ha’u ko’alia fali ho Deputadu sira atu haree asuntu ne’e”, Xefe Estadu afirma.
Xefe Estadu rekoñese Governu hamosu subsídiu ba uma-kain “fim do ano” tanba buka ajuda dala ida tán ba populasaun ka ne’ebé maka iha duni situasaun difisíl hodi bele gojanetik sira nia nesesidade iha “fim do ano”
“Tanba ne’e, ha’u hanoin sira ne’ebé iha ona vensimentu di’ak ne’e lalika simu”, katak.
Entertantu, Governu liuhosi reuniaun Konsellu Ministru (KM), aprova projetu dekretu-lei, ne’ebé aprezenta hosi Primeiru-Ministru, Taur Matan Ruak, ne’ebé prosede ba alterasaun dahuluk dekretu-lei númeru 37/2022, loron 25 maiu, kona-ba subsídiu fim do ano ba uma-kain, hodi klarifika ámbitu aplikasaun.
Nune’e, Governu mantein desizaun atribuisaun subsídiu $200 ba uma-kain hotu ka ho natureza universal, maibé ba implementasaun iha esesaun ba membru órgaun soberania sira no eis titulár sira.
Governu liuhosi Ministériu Solidariedade Sosiál no Inkluzaun (MSSI) planeia halo abertura ba atribuisaun subsídiu ne’e iha loron 16 novembru 2022.
Ministériu Administrasaun Estatál (MAE) submete ona dadus uma-kain 39.000 ba Ministériu Solidaridade Sosiál no Inkluzaun (MSSI) ho totál pagamentu millaun $7,8 resin.
Notísia relevante: MSSI hahú prodús lista pagamentu ba subsídiu $200 ba uma kain
Jornalista : Natalino Costa
Jornalista : Florencio Miranda Ximenes
