iklan

NASIONÁL, HEADLINE, POLÍTIKA

Membru Governu deside la simu subsídiu $200

Membru Governu deside la simu subsídiu $200

Edifísiu Palásiu Governu. Imajen Tatoli/Francisco Sony

DILI, 05 outubru 2022 (TATOLI)— Portavós Governu no Ministru Prezidénsia Konsellu Ministru, Fidelis Manuel Leite Magalhães, hateten, membru Governu sira deside la simu subsídiu ‘fim do ano’ ho montante $200.

“Membru Governu sira deside ona katak sira la presiza ba simu subsídiu $200. Ha’u ko’alia rasik ho Primeiru-Ministru no Vise Primeiru-Ministru na’in-rua katak hotu-hotu halo desizaun hodi kontribui hamutuk hodi fó ba hirak ne’ebé presiza liu, bainhira sira seluk lakohi simu husik hela iha kofre Estadu, nune’e bele uza fali ba prioridade dezenvolvimentu sira seluk,” Ministru relata hafoin reuniaun ezekutivu, iha Palásiu Governu, kuarta ne’e.

Notísia relevante: Governu deside uma-kain hotu simu subsídiu $200

Ministru dehan, Governu respeita deklarasaun no opiniaun entidade sira hotu liga ho desizaun sira ne’ebé halo ona.

“Ami respeita órgaun espesializadu sira hanesan Komisaun Antí-Korrupsaun ne’ebé tau-matan ba korrupsaun sira, ne’e sira-nia knaar, Governu orgullu tanba ita iha lei kontra korrupsaun ne’ebé forte, maibé kona-ba desizaun sira ne’e tanba Governu nia konsiderasaun ba preokupasaun sosiál no ekonómika, sira ne’e hotu mak lori Governu to’o halo desizaun,” nia akresenta.

Governante ne’e rekoñese, bainhira halo diskusaun hodi uma-kain hotu iha territóriu nasionál simu subsídiu fim do ano iha Konsellu Ministru, momentu ne’ebá konsege mosu pro no kontra entre governante sira.

“Iha Governu laran rasik bainhira iha reuniaun Konsellu Ministru mosu pro no kontra ba desizaun hirak ne’e, maibé desizaun mak avansa ho modelu ne’ebé ita iha, agora buat ne’ebé Governu halo maka naturalmente Governu sei artikula di’ak liután ho Prezidente Repúblika karik nia hanoin di’ak liu altera iha parte ne’ebé, Governu nakloke tanba Prezidente Repúblika halo kontrolu polítika Governu,” nia tenik.

Notísia relevante: Atribui ba uma-kain hotu, CAC husu PR Horta veta Dekretu-Lei subsídiu $200

Maski nune’e, Primeiru-Ministru, Taur Matan Ruak, antes ne’e dehan ona katak importante atu haree intervensaun ne’e ho justu no fahe halo didi’ak, karik presiza esklui ema balun, ho kategoria saida de’it tanba esbosu dekretu-lei ne’e sei iha hela Prezidénsia Konsellu Ministru (PCM, sigla portugés) no bele deskute hela kona-ba modalidade saida mak di’ak.

Tuir planu subsídiu fim do ano ho montante $200 ba kada uma-kain sei lansa iha loron 16 novembru 2022.

Ministériu Administrasaun Estatál (MAE) submete ona dadus uma-kain 39.000 ba Ministériu Solidaridade Sosiál no Inkluzaun (MSSI) ho totál pagamentu millaun $7,8 resin.

Bazeia ba dekretu-lei númeru 37/2022, loron 25 maiu, artigu 2, benefisiáriu sira ba subsídiu ne’e hanesan uma-kain sira ne’ebé rejistadu ona iha livru rejistu uma-kain iha suku iha teritóriu nasionál tuir termu previstu iha diploma ministeriál númeru 49/2017 23 agostu.

Ba efeitu númeru anteriór, konsidera katak hirak ne’ebé rejistadu ona iha livru rejistu uma-kain ne’e hanesan sira ne’ebé mak rejistu ona uma-kain no rejistu válidu to’o 28 agostu 2022.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!